Üzbäkstanda säyäsi partiyälär ilbaşı namzätlären bilgelägän

Üzbäkstanda İslam Kärimov wafat bulğannan soñ 4 nçe dekabr’dä ütkäreläçäk ilbaşı saylawı öçen barlıq säyäsi partiyälär namzätlären bilgelägän.

”Milli şahlanış demokrat” partiyäse liderı Sarvar Atamuradov,”Ğadälät soŝial demokrat” partiyäse liderı Nariman Umarov,”Xalıq demokrat” partiyäse citäkçese Hotamjon Kätmonov namzät itep kürsätelgän.

Üzbäkstannıñ waqıtlı ilbaşı Şavkat Mirziyoyev “Liberal demokrat” partiyäneñ kiçäge säyäsi şura cıyılışında ilbaşı namzäte itep kürsätelgän bula.

Partiyälärneñ üzäk başqarma komitetlarında bilgelängän namzätlär partiya qorıltaylarında raslanğannan soñ Üzäk saylaw komissiyäsenä räsmi räweştä möräcäğät itäçäk.

Qanun kirägençä Üzbäkstanda barı tik säyäsi partiyälär ilbaşı namzäte täqdim itä ala.

İldä 4 nçe dekabr’dä uzaçaq ilbaşı saylawında isä 35 yäşkä citkän häm soñğı 10 yılda ildä daimi yäşäwçelär ilbaşı namzäte bula ala.