Törkiyä başqalasında Qayum Nasıyri simpoziumı uzdı
Başqala Änkarada tatar mäğrifätçese Qayum Nasıyri iskä alındı.
Kürenekle tatar ğalime, yazuçı häm mäğrifätçe Qayum Nasıyrigä bağışlanğan simpozium 15nçe may comğa könne Änkarada TÜRKSOY xalıqara törki dönya sänğät oyışmasınıñ üzäk binasında ütkärelde.
Kürenekle tatar ğalimeneñ tuuına 190 yıl tulu mönäsäbäte belän Qazan Federal universitetı häm TÜRKSOY oyıştırğan xalıqara fänni cıyında Qayum Nasıyrineñ tormışı, äsärläre, eşçänlege añlatıldı.
TÜRKSOY ğomum särkätip urınbasarı dotsent doktor Fırat Purtaş açıp cibärgän simpoziumda Tatarstannan professor, doktor Rädif Cämäletdinov “Dönya külämendä tatar teleneñ häm mädäniyäteneñ tanıtıluında Qayum Nasıyri institutınıñ role" isemle doklad belän çığış yasadı.
İstanbul universitetı qarşındağı Awraziya institutı mödir urınbasarı İsmät Binär “Törek çığanaqlarında Qayum Nasıyri" temasın yaqtırttı.
Dotsent, doktor Gölnara Cämäletdinovanıñ çığışı “Tatar xalqınıñ metodik mirası bularaq Qayum Nasıyrineñ däreslekläre" temasına bağışlandı.
Dotsent, doktor Tahir Ğiläcev Qayum Nasıyrine ädäbiyatçe, ğalim häm folklorçı yaqları belän tanıttı.
Tatarstannan professor, doktor Älfiyä Yosıpova häm doktor Räsim Xösnetdinov, Törkiyädän professor, doktor Mäxmät Kalpaklı, dotsent, doktor İsmail Türkoğlu belän fännär kandidatı, doktor Mätin Dämirci dä Qayum Nasıyri eşçänlegen kiñ yaqlap tanıştırıp uzdı.
Bäyläneşle xäbärlär
Antaliyada - “Tuqay, quray, şiğır’”
Ğabdulla Tuqaynıñ tuğan köne uñayınnan Törkiyäneñ Antaliya şähärendä şiğır' kiçäse ütkärelä
