Musa Carullah Bigi: “Üz azat watanıbızğa qayta alsaq”

Böyek tatar din belgeçe, fälsäfäçe, ädip, 20nçe ğasır başındağı Rusiyä möselmannarınıñ aldınğı xäräkät äydäp baruçılarınnan berse Musa Carullah Bigi turında Törkiyädä fänni tikşerenülär ütkärelgän, kitaplar näşer itelgän, ğilmi cıyınnar uzdırılğan bulsa, soñğı yıllarda Tatarstanda häm ğomumän Rusiyä Federatsiyäsendä dä ğibrätle yazmışı bulğan millättäşebez telgä alına, tormışı häm xezmätlärenä bağışlap basmalar, mäqalälär dönya kürä, xalıqara fänni cıyınnar ütkärelä başladı.

Şundıylarnıñ berse - bıyıl aprel’ ayında Rusiyä Federatsiyäseneñ Sankt-Peterburg qalasında Musa Carullah Bigigä bağışlap inde öçençe tapqır oyıştırılğan Xalıqara konferentsiyä.

Bügenge yazmada şuşı fänni cıyında qatnaşqan çit il qunaqları arasında bulğan Paqıstannan üzbäk jurnalistı Oğuz Haşmioğlı belän äñgämä täqdim itäbez.

Oğuz äfändeneñ ätise Maulana Azam Haşmi Musa Carullah Bigi belän tanışqan bula, xätta üzen Hindıstanda çaqta törmädän, zindannan qotqara, azat itä.

1913nçe yılda tuğan häm 1973nçe yılda wafat bulğan Maulana Azam Haşmi – Hindıstanda törki möhacirlär belän bäyle êşçänlek alıp bara, “Tärcüman” häm “Tärcüman-ä-Afkar” jurnallarınıñ möxärrire bula.

Rusiyäneñ Penza yaqlarında 1873nçe yılda tuıp üsep, canın täslim qılğan 1949nçı yılğa qädär ğomeren möhacirlektä ütkärergä mäcbür bulğan häm käbere Misırda urnaşqan mäşhür tatar din ğalime, ädip, fälsäfäçe Musa Carullah Bigineñ Hindıstandağı köräştäşe, üzbäk jurnalistı häm cämäğät êşleklese Maulana Azam Haşmineñ ulı Oğuz Haşmioğlı belän äñgämäne biredäge tawış uynatqıçınnan tıñlıy alasız.

Videoyazmanı isä biredän qarıy alasız.

Fotosürättä: Paqıstannan üzbäk jurnalistı Oğuz Haşmioğlı (uñda) “Törkiyä awazı” radiosınıñ tatar redaktsiyäse citäkçese Säğit Xäyri belän bergä.