Törek matbuğatına küzätü 15.09.2022
15nçe sentyabr' könne çıqqan qayber törek gazetlarına küzätü
“Star” gazetı Ärdoğannıñ “Azärbaycannıñ yanında buluıbıznı böten dön’ya belergä tiyeş” digän süzlären citkerä.
Türkiye ilbaşı Räcäp Tayyip Ärdoğan Ärmänstannıñ Azärbaycan belän suğıştan soñ tözelgän kileşüne bozuın qabul itelmäslek dip belderde. Ul “Azärbaycanlı qardäşlärebez yanında buluıbıznı böten dön’ya belergä tiyeş”-dide häm “Karabax suğışınnan soñ imzalanğan kileşüneñ şartların ütämäwçe häm daimi räweştä agressiyäsen kürsätüçe Ärmänstan bu ğamälläre öçen, älbättä, cawap biräçäk” dip östäde.
“Yeni Şafak” gazetı Yaponiyä matbuğatındağı Türkiye belän bäyle analitik mäqalä xaqında citkerä.
Yaponiyäneñ iñ borınğı gazetlarınnan berse - Sankey Şimbun Türkiyeneñ Rusiyä-Ukraina suğışındağı aradaşçı rolen analizladı. Anda ilbaşı Ärdoğannıñ bu êştäge öleşe qarala häm Könbatışnıñ Türkiyegä tayanudan başqa çarası bulmawı assızıqlana.
“Hürriyet” gazetı “Türkiyeneñ uñışı Greśiyäne tilertä” digän xäbärendä Tışqı êşlär ministrı Mäwlet Çavuşoğlunıñ belderüenä iğ’tibarnı cälep itä.
Ul Türkiyeneñ xalıqara arenadağı abruyı häm uñışlarınıñ Greśiyäneñ açuın çığaruın häm şuña kürä daimi räweştä provokaśiyälär belän qotırtırğa mataşuın äytä. Çavuşoğlu misalğa törek jetlarına bäylänü, S-400 hawa saqlanu sistemaları belän alarnı yozaqlawlarnı kiterä.
“Haber Türk” gazetı ministr Soylunıñ Greśiyä häm Awrupağa videolı cawabı turında yaza.
Türkiye êçke êşlär ministrı Söläyman Soylu Êgey diñgezendä ülemğä taşlap qaldırılğan qaçaqlar nisbätennän Greśiyägä reakśiyä belderde. Ul Muğla sulıqlarında cansız gäwdäläre tabılğan 2 balanıñ videosın urtaqlaştı häm “Keşelegegezne qahär suqsın. Awrupa häm Greśiyä, bu ülemnär öçen sez cawaplı” dip yazdı.
“Sabah” gazetı Varanknıñ “Türkiyede iskitkeç mömkinleklär bar” digän süzlären citkerä.
Sänäğat’ häm texnologiyä ministrı Mostafa Varank koronavirus kizüe çorında Türkiyeneñ citeşterüne däwam itep üzäk däwlätkä äwerelüen äytte. “Türkiyeneñ niqadär ışanıçlı urın ikänen böten dön’yağa kürsättek,”-dide ul dön’yaküläm markalarnıñ kertemnären tizlätüne maqsat itep quyuların assızıqladı.
