Törek matbuğatına küzätü 31.08.2022

“Haber Türk” basması yazğança, Türkiye ilbaşı Räcäp Tayyip Ärdoğan Türkiye xärbi oçqıçlarına S-300 saqlanu sistemaların biklägän Greśiyägä kisken reakśiya belderde. “Bu - doşmança ğamäl , bu – NATOğa qarata yasalğan ğamal” dide. Ärdoğan Greśiyäneñ Türkiyeneñ säyäsi, iq’tisadi häm xärbi äñgämädäşe tügellegen dä assızıqladı.

”Star” basması Türkiye ilbaşı Ärdoğannıñ “Türkiye üzenä birelmägänne citeşterä ala” digän süzlären alğı planğa çığara. İlbaşı Ärdoğan Türkiyene F-35 xärbi oçqıçları belän täêmin itmägän Amerika Quşma Ştatlarına reakśiya belderep bolay dide:” Bezgä F-35 birmilär, bez satıp alğan saqlanu sistemalarına reakśiya belderälär. Birmäsennär, bez bezgä birelmägän här närsäne citeşterä alabız”.

”Yeni Şafak” gazetı citkergänçä, ilbaşı Räcäp Tayyip Ärdoğan Türkiyeneñ qaya ğına ayaq bassa da tınıçlıq, duslıq, mullıq kiterüen äytte. Ärdoğan bilgeläp uzğança, Afrikadan Kön’yaq Amerikağa qadär ğasırlar däwamında zolım kürgän häm mölkätläre talanğan niçaqlı cämğıyät’ bulğan bulsa Türkiye alarnıñ barısınıñ da iñ tuğrı yuldaşı buldı.

”Vatan” basması Awupa Berlege aşlıq kileşüe öçen Türkiyegä räxmät äytte dip yaza. Awrupa Berlegeneñ tışqı mönäsäbätlär häm qurqınıçsızlıq säyäsäte yuğarı wakile Jozep Borrel’ äytüençä, böten dön’ya inflyaśiya häm burıçlar näticäsendä kilep çıqqan finans awırlığı arqasında problemalar kiçerä. “Bolar barısı däwam itkändä, bez aşlıq kileşüe imzalanuına häm anıñ tormışqa aşırılğanın kürüebezgä bik şat. Berläşkän Millätlär Oyışmasına häm Türkiyegä räxmätebezne belderäbez” dide Borrel’.

 “Hürriyet” gazetı aviaśiya, ğaläm häm texnologiya festivale TEKNOFEST nıñ Türkiyeneñ Samsun qalasındağı Çärşämbe aêroportında başlanuın xäbär itä. TEKNOFEST kürgäzmäsenä  Türkiyeneñ cirle keşesez hawa apparatları, boralaqlar häm reaktiv oçqıçları quyılğan. 4 nçe sentyabr’gä qadär däwam itäçäk festival’ qısalarında törle tamaşalar häm texnologiya yarışları uzaçaq.