Törek matbuğatına küzätü 04.01.2022
4nçe ğıynvar könne çıqqan qayber törek gazetlarına küzätü
“Haber Türk” gazetı Ärdoğannıñ süzläre belän “Barısı da üsüçe Törkiyäne yuğarı bäyäli” dip yaza.
İlbaşı Räcäp Tayyip Ärdoğan soñğı 20 yılda asqormadağı alğa kiteş arqasında Törkiyäne sälamätlek saqlaw krizisınnan ähämiyätle külämdä ayırıp toruların belderde. Koronavirus kizüe uzğan yıl dön’ya iq’tisadlarına basımın arttırğanda Törkiyä tiz üseş tendenśiyäsen däwam itte. Ärdoğan älege xällärne küzätep baruçı härkemneñ Törkiyäneñ bu noqtağa kilüenä yuğarı bäyä birüen assızıqladı. Üseş turizmda da çağıldı. “Turizmda, bıltırğa qarağanda, kilüçe sanında 83%, keremdä 100% üseş täêmin ittek,”-dide ilbaşı.
“Hürriyet” gazetı Törkiyäneñ êksporttağı rekordları turında citkerä.
Törek iq’tisadı investiśiyä, mäşğul’lek, citeşterü, êksport yulı belän üseş prinśipları nigezendä alğa baruın däwam itä. Törkiyä 2020nçe yılnı üseş belän yapqan ike däwlättän berse ide. 2021nçe yılda da ilneñ tulayım êksportı, uzğan yılğa qarağanda, 32,9%qa artıp rekord yasadı häm 225 milliard dollardan artıp kitte.
“Star” gazetı Törkiyä belän AQŞ arasındağı kritik söyläşü turında yaza.
Törkiyä tışqı êşlär ministrı Mäwlet Çavuşoğlu Amerika Quşma Ştatları däwlät särqatibe Êntoni Blinken belän telefon aşa söyläşte. Anda kiläse çorğa planlaştırılğan NATO häm Awrupa iminlek häm xezmättäşlek oyışmasınıñ cıyılışları aldınnan Rusiyä belän Ukraina arasındağı kiyerenkelek, Törkiyä belän AQŞ mönäsäbätlärenä can örü häm başqa mäs’älälär qaraldı.
“Yeni Şafak” gazetı Turkovaknı yasawçı törkemneñ Omikronğa qarşı êşçänlek alıp baruın citkerä.
Koronavirusqa qarşı uylap tabılğan häm Del’ta variantınnan tulısınça saqlawçı Turkovak vakśinasınıñ fänni törkeme xäzer Omikron variantın izolyaśiyäläw öçen tırışa. Êşçänlek 2-3 ay däwam itäçäk.
“Sabah” gazetı bıyıl Pamukkalega 2 million keşeneñ kilüen kötülüen xäbär itä.
BMOnıñ UNESCO dön’ya mirası isemlegenä kertelgän häm Törkiyädä iñ küp turistnı cälep itüçe urınnarnıñ berse bulğan Pamukkale uzğan yıl 1 million 200 meñ 650 turistnı qunaq itte. Tarmaqta xezmät quyuçılar bıyıl älege sannıñ 2 millionğa citäçägen uylıy.
