Törek matbuğatına küzätü 06.12.2021
Qayber törek basmalarına küzätü
“Xörriyät” gazetı yazğança Törkiyä ilbaşı Räcäp Tayyip Ärdoğan xatın-qızğa saylau-saylanu xoquqı birelüeneñ 87 yıllığı uñayınnan video yullama yasadı. İlbaşı yullamasında törek xatın-qızlarınıñ şaqtıy xaq-xoquqnı Awrupalılardan alda aluına basım yasadı.
“Star” basması beldergänçä Berläşkän Millätlär Oyışması Jenevadağı kritik global’ operaŝiya berämleklären İstanbulğa küçerergä qarar birde. Berençe itep “Humanitar êşlärne koordinaŝiyaläü ofisı” Törkiyägä küçenä. Anıñ belän bergä tağın 8 kritik oyışmanıñ İstanbulda ofis açuı öçen êşçänleklär alıp barıla. Törkiyäneñ tışqı êşlär ministr yärdämçese Yavuz Selim Kıran: “Humanitar êşlärne koordinaŝiyaläü ofisı”nıñ İstanbulğa kilüe İstanbulnı BMO üzägenä äyländerü maqsatıbız cähatennän möhim adım bulaçaq,” – dide.
“Xäbät türk” gazetı citkergänçä 25 yıldan soñ Törkiyä-Liviya arasında başlatılğan köymä säfärlärendä berençe köymä İzmirğa kilep citte. Atnada ber tapqır çınğa aşaçaq köymä säfärläreneñ berençesendä 112 yulçı İzmirğa kilde.
“Yeni Şafak” basması xäbärenä kürä Barselona kileşüeneñ 22nçe Taraflar konferenŝiyase (COP 22) 7-10nçı dekabr’ könnärendä Antaliyada oyıştırılaçaq. Cıyılışta Urta diñgezdäge kerlelek, biotörlelekneñ yuğaluı, çit törlärneñ buluı häm klimat üzgäreşe quzğatılaçaq. COP 22dän soñ Törkiyä Barselona kileşüe särqätiplege räislege wazıyfasın İtaliyadan üz östenä alaçaq.
“Sabah” gazetı yazğança Yapon säyäxät agentlıkları berlege Awrupanıñ iñ matur 30 rayonın sayladı. Törkiyädän dä Bursanıñ Gölyazı rayonı bu isemlektä urın aldı.
