Törek matbuğatına küzätü 13.10.2020
13nçe oktyabr' könne dön'ya kürgän qayber törek gazetlarına küzätü
“Star” gazetı Ärdoğannıñ Könçığış Urta diñgez belän bäyle çığışın citkerä.
Ärdoğan kiçä Awrupa Berlege şurası räise Çarl’z Mişel’ belän telefonnan söyläşte. Anda ilbaşı Törkiyäneñ yaxşı niyätle buluına qaramastan, Greśiyäneñ Könçığış Urta diñgezdä kiyerenkelekne arttıruçı adımnarın däwam itüen belderde. Ärdoğan Törkiyä kiñäş itkän Könçığış Urta diñgez konferenśiyäsen tormışqa aşıru öçen Awrupa Berlegennän konkret êşlär kötülären dä äytte.
“Hürriyet” gazetı “Tişqi êşlärdän Greśiyägä “Oruç Räis” cawabı” digän mäqalä urnaştıra.
Törkiyä tışqı êşlär ministrlığı“Oruç Räis” êşçänlege öçen iğ’lan itelgän NAVTEX kisätüennän soñ Greśiyä tışqı êşlär ministrlığınıñ nigezsez farazların alğa sörep qabat qarşı kilüen citkerde. “Könçığış Urta diñgezdä iñ ozın yar buyına iyä ilebezneñ materikka 15 çaqrım yıraqlıqta êşçänlek alıp baruına qarşı çığu qabul itelmäyäçäk,”-diyelä belderüdä.
“Haber Türk” gazetı Altunnıñ “Mineke - mineke genä, sineke – söyläşenäçäk disägez, söyläşü bulmayaçaq” digän süzlären alğı planğa çığara.
İlbaşı cämäğat’çelek belän êlemtä idaräse başlığı Fäxretdin Altun kiçä “Oruç Räis” köymäseneñ wazıyfasın qabat başlawı belän bäyle belderüdä bolay dide: “Planlı texnik êşlärdän soñ korab Könçığış Urta diñgezgä kire kitte. Diñgez yurisdikśiyäse qısalarında êşçänlegen alıp baraçaq. Süzebez açıq: mineke – mineke genä, sineke – söyläşenäçäk disägez, söyläşü bulmas”.
“Sabah” gazetı Törkiyä häm Rusiyä arasındağı kritik söyläşü turında citkerä.
Törkiyä milli saqlanu ministrı Xulusi Akar Rusiyädäge wazıyfadaşı Sergey Şoygu belän telefonnan söyläşte. Ministrlıqtan älege fiker alışu xaqında belderü yasaldı. Anda äytelgänçä, süz Ärmänstannıñ Azärbaycanğa höcüme, İdlib, Liviyä, saqlanu häm iminlek mäs’äläläre xaqında bara. Akar Şoyguga Ärmänstannıñ toraq punktlarğa höcümnären tuqtatuı häm yawlap torğan cirlärdän çığuı kiräklegen belderde.
“Vatan” gazetı xäbär itkänçä, Törkiyädä täwge tapqır litiy citeştereläçäk.
Ênergetika häm tabiğıy çığanaqlar ministrı Fatix Dönmäz Törkiyädä litiy citeştereläçägen belderde. Ul ildä çığarıluçı êlektrlı maşinalarda qullanılaçaq.
