Törek matbuğatına küzätü 15.09.2020
15 sentäbr' könne basılğan qayber törek basmalarına küzätü
“Vatan” gazetı beldergänçä İlbaşı idaräse süzçese İbrahim Qalın soŝial’ mediada yasağan açıqlawında: “Könçığış Urta diñgezdä problemalarnıñ tınıç maqsatlı çişeleşe mömkin. Döreslekkä tayanğan, kiñ qırlı häm raŝional’ totışlar qoruçı öleş kertäçäkter. Törkiyä berkemneñ dä cirenä küz salmıy. Läkin berkemgä dä üz xaq-xoquqların izdermiyäçäk,” – dide.
“Xörriyät” basması yazğança tışqı êşlär ministrı Mäwlüt Çavuşoğlu Könçığış Urta diñgez häm Greŝiya belän bäyle bularaq tübändägeçä citkerde: “Greŝiya alşartlar quysa, bez dä quyarbız. Alşartlarnı söyläşkännän soñ da cirenä citkerä alalar. Greŝiya Sevil’ya kartasınnan waz kiçmiçä häm Törkiyägä xörmät kürsätmiçä bu kiyerenkelek betmäs.”
“Yeni Şafak” gazetı xäbärenä kürä alman “Die Welt” basmasında Törkiyä ilbaşı Räcäp Tayyip Ärdoğannıñ kiyemenä urın birelä.
Gazet yazğança yazmada Törkiyä ilbaşınıñ säyäsättä bulğanı kebek kiyenüdä dä üz vizionın çağıldıruına işarät itelä.
“Sabah” gazetı sänägät’ häm texnologiya ministrı Mostafa Varanknıñ iyul’ ayında sänägät’ citeşterüeneñ aylıq 8,4% häm yıllıq 4,4%ka artuın belderep: “3nçe çirektä dä üseş kötäbez,” – dip äytüen citkerä.
“Star” basması beldergänçä Nevşehirneñ Gülşehir ilçäsendäge 800 yıllıq yatmadan çığarılğan 150 meñ tonna qıya tozına Törkiyä häm çit illärdän taläp kilä.
Xäbärdän kürengänçä toz yatmasın êşlätüçe Suat Bilgin: “Germaniya, Franŝiya häm Niderlandtan taläp kilä läkin barısın da qanäğat’länderä almıybız. Sälamätlek saqlaw turizmı öçen açarğa uylıybız,” – dide.
