Törek matbuğatına küzätü 04.03.2020

”Star” gazetı “Çavuşoğlu beräwne dä mäcbüri räweştä Törkiyädä tota almawların belderde” isemle yazmasında  Törkiyä tışqı êşlär ministrı Mävlüt Çavuşoğlunıñ qaçaqlar belän bäyle yasağan belderüendä “Awrupa Berlege oyışmaları Awrupanıñ häm keşelek dönyasınıñ urtaq qıymmätlärenä xörmät kürsätergä tiyeş. Yaña küçenü ağımın kütärä almawıbıznı, moña köçebez citmäwen küp tapqırlar belderdek. Beräwne dä mäcbüri räweştä Törkiyädä tota almıybız” dip äytüen citkerä.

 “Sabah” gazetı “Täwge tapqır maqsatlarğa törkem xälendäğe qorallı keşesez hawa apparatları belän höcüm ittek” isemle xäbärendä Törkiyäneñ dönyada täwge tapqır törkem xälendä xäräkät itüçe qorallı keşesez hawa apparatların bäreleşlär mäydanında qullanuı turında yaza. Törek Qorallı Köçläre İdlibtäge “Yaz qalqanı” xäräkätendä maqsatlarğa törkem xälendäge qorallı keşesez hawa apparatları belän höcüm yasadı. Alar rejim köçlären täêsirsez xälgä kiterde häm awır qoralların , suğış kiräk –yaraqları saqlağıçların yuqqa çığardı.

”Vatan” gazetınıñ ”Dönyanıñ iñ köçle hawa köçläre açıqlandı” isemle yazmasınnan kürengänçä, üzäge Amerika Quşma Ştatlarında urnaşqan “Global Firepower”nıñ  2020 nçe yıl xisabına kürä Törek Qorallı Köçläre dönyanıñ iñ köçle hawa köçlärenä isemlegendä berençe unlıqqa kerde. İsemlektä berençe urında AQŞ tora, Törkiyä isä 9 nçı urında.

”Yaña Şafak” gazetı “Êlek çittän ala idek, xäzer üzebez dönyağa satabız” isemle xäbärendä awıl xucalığınnan sänäğät’kä qadär citeşterüdäge şaqtıy tarmaqta qullanılğan vermikulitnıñ iskitkeç üzençälekläre buluı turında yaza. Cılıtqanda 10 tapqırğa zurayğan metall Törkiyädä täwge tapqır Sivasta çığarıldı. Êlegräk çittän alınğan älege metallnı Törkiyä xäzer êşkärtep üze başqa illärgä sata.

”Xörriyät” gazetı “Çit il keşeläre 5 kilogramm êşkärtelmägän altın kiterä ala” isemle xäbärendä yazğança, Törkiyä Cömhüriyäte watandaşı bulmağan häm ilgä kergändä 18 yäşe tulğan yulçılar 1 yıl êçendä ber tapqır iñ kübe 5 kilogramm êşkärtelmägän altın alıp kilä ala.