Törek matbuğatına küzätü 26.12.2019

“Xäbär Türk” gazetı Ärdoğannıñ süzläre belän “Liviyä xärbilär cibärüebezne teläsä, çaqıruğa cawap birerbez” dip yaza.

Kiçä Tunisqa kötelmägän säfär yasağan ilbaşı Räcäp Tayyip Ärdoğan Liviyädä utnı tuqtatu kiräklegen äytte häm Fayiz äs-Sarrac xökümätenä teläktäşlegen belderde. Ul Xafternıñ qanunlı idaräçe bulmawın assızıqladı häm Liviyä taläp itsä, xärbilär cibäräçägen tağın ber qat iskärtte.

“Yaña Şäfaq” gazetı “Törek ağımı täwge gaz ağımı öçen xäzer: 8nçe ğıynvarda açılaçaq” dip xäbär itä.

Rusiyä gazın Qara diñgez häm Törkiyä arqılı Awrupağa iltäçäk 935 çaqrım ozınlığındağı “Törek ağımı” ütkärgeçe zäñgär yağulıq öçen xäzer xälgä kiterelde. Proyektnıñ räsmi açılu tantanası 8nçe ğıynvarda İstanbulda tormışqa aşırılaçaq. Anda ilbaşı Räcäp Tayyip Ärdoğannıñ häm Rusiyä däwlät başlığı Vladimir Putinnıñ qatnaşuı kötelä.

“Star” gazetı Törkiyädän Gruziyägä xärbi reforma öçen 100 million lira bülenüe turında yaza.

Törkiyä saqlanu ministrı Xulusi Akar häm Gruziyä saqlanu ministrı İrakli Garibaşvili törek häm gruzin xökümätläre arasında xärbi-finans xezmättäşlek kileşüe imzaladı.  

“Xörriyät” gazetı “Cirle avtomobil’ tüzemsezlek belän kötelä” dip citkerä.

Cirle avtomobil’neñ tışqı küreneşen qızıqsınıp kötälär. Törkiyäneñ Avtomobil’ iniśiativa törkeme sośial’ media Twitter aşa yaña maşinanıñ qayber öleşläreneñ fotosın urtaqlaştı. Anda diffuzornıñ lälä çäçäge figuralı buluı kürenä. Monnan alda da törkem maşinanıñ közgeläre häm tübäse räsemen internetqa çığarğan ide.  

“Sabax” gazetı xäbär itkänçä, “Törkiyäneñ 2020nçe iq’tisadi yılı kürsätkeçläre uñay”.

Törek iq’tisadında kürelgän çaralar makro-iq’tisad kürsätkeçlärendä dä çağıldı. 2020nçe yılda tarmaqta uñay üzgäreşlär kötelä. Üseş 5% däräcäsendä farazlana.