Törek matbuğatına küzätü 04.11.2019

.

 “Vatan” gazetı “İlbaşı Ärdoğannan Süriyä çik buyına kötelmägän säfär” isemle xäbärendä Törkiyä ilbaşı Räcäp Tayyip Ärdoğannıñ Şanlıurfadağı cir öste öçläre komandirlığınıñ urtaq xäräkät üzägenä baruı turında yaza. Ul biredä komandirlardan  “Solıx çişmӓse” xӓrӓkӓte belӓn bӓyle mӓğ’lümat aldı.Programmada saqlanu ministrı Hulusi Akar, êçke êşlär ministrı Sölayman Soylu, ğomum ştab başlığı armiya generalı Yaşar Gülär, cir öste köçläre komandirı armiya generalı Ümit Dündar, hawa köçläre komandirı armiya generalı Hasan Küçük Akyüz, diñgez köçläre komandirı armiya admiralı Adnan Özbal häm ilbaşı idaräseneñ êlemtä bülege başlığı Fahrettin Altun da qatnaştı.

”Yaña Şafak” gazetı ”Bäbilär qatıyle “YPG/PKK”ga köçle höcüm” isemle xäbärendä xalıqnıñ tınıçlığı häm iminlegen bozarğa teläwçe “YPG/PKK” separatist terror oyışmasına oktyabr’ ayında oyıştırılğan operaśiyälärdä 1090 terrorçınıñ täêsirsez xälgä kiterelüen citkerä. Alar arasında maxsus êzlängän qızıl kategoriyädä urın alğan 2 terrorçı da bar. 9 nçı oktyabr’dä başlanğan “Solıx çişmäse” xäräkäte belän terror oyışmasına köçle höcüm yasaldı.

”Xäbär Törek” gazetınıñ  “Törkiyä AQŞ häm Franśiyanı ğayepläde” isemle xäbärennän kürengänçä, Törkiyä saqlanu ministrlığı güyä ärmän däğ’waların qabul itkän Amerika Quşma Ştatları wäkillär palatası belän “PKK/YPG”nı berlektäş itep bilgeläwçe Franśiya parlamentın ğayepläde. “Alarnıñ tarixi xataların añlawlarına ışanıp qalabız” diyelde belderüdä.

”Star” gazetı “Ärdoğannıñ çaqıruı belän êşkä kereştelär” isemle yazmasında Törkiyä ilbaşı Räcäp Tayyip Ärdoğannıñ ğalimnärebezne ilebezdä başlatılğan belem häm texnologiya iniśiativasında qatnaşu çaqıruına dönyanıñ törle poçmaqlarında yäşäwçe 14 meñ törek tabibınıñ uñay cawap birüen xäbär itä. Mediśina tarmağında başqarğan êşläre öçen xalıqara büläklärgä layıq kürelgän ğalimnär Änkara şähär xastaxänäseneñ xalıqara internet portalında oçraştı. 14 meñ ğalim sälämätlek saqlawda dönya bazası bulunı maqsat itep quyğan Törkiyä öçen daru êşläp çığaraçaq , mediśina cihazları citeşteräçäk , operaśiyälär yasayaçaq.

”Xörriyät” gazetı “Qıtaydan Awrupağa kitäçäk täwge yök poyezdı 6 nçı noyabr’dä Änkarada” isemle xäbärendä Qıtaydan yulğa çığıp Törkiyä aşa Awrupağa kitäçäk täwge yök poyezdı China Railway Expressnıñ 6 nçı noyabr’dä Änkara vokzalına kilep citäçägen häm biredä Törkiyä transport häm asqorma ministrı Cahit Turhannıñ qatnaşında qarşı alu tantanası uzaçağın uquçıları belän urtaqlaşa. Tantanada Qıtay häm töbäk illäre räsmiläreneñ dä qatnaşuı kötelä.