Törek matbuğatına küzätü 11.07.2019
11nçe iyül' könne çıqqan qayber törek gazetlarına küzätü
“Yaña Şäfaq” gazetı “AQŞnıñ S-400 turındağı belderüenä Törkiyäneñ cawabı”n yaza.
Törkiyä tışqı êşlär ministrlığı süzçese Xami Aksoy AQŞ däwlät departamentı süzçese Morgan Ortagusnıñ S-400lärne satıp aluğa qarşı belderüennän soñ bolay dide: “AQŞ tarafın diplomatiyä häm dialognı çitkä tibärep mönäsäbätlärgä zarar biräçäk yalğış adımnar yasawdan tayçınırğa çaqırabız”.
“Star” gazetı “Ministr Mäwlet Çavuşoğlu”nıñ Urta diñgez açıqlawı”n alğa çığara.
Törkiyä tışqı êşlär ministrı Mäwlet Çavuşoğlu Urta diñgezneñ könçığışındağı kiyerenkelek belän bäyle bularaq yasağan belderüendä bolay dide: “Bu Törkiyäneñ suverenlıq xoquqı. Berkemneñ dä moña qarşı kilü xaqı yuq. Qıytğa mäydanında närsä êşlärgä ikänenä barı Törkiyä üze qarar birer. Xalıqara xoquq qısalarında adımnar yasıybız. Borawlaw êşçänlegebezne däwam itäçäkbez”.
“Xäbär Türk” gazetı yazğança, “İstanbul aêroportında 3nçe yulnı xäzerläw däwam itä”.
2020nçe yılnıñ ikençe yartısında xezmätkä başlayaçaq 3nçe bäysez oçış yulı belän İstanbul aêroportı bik küp parallel’ operaśyälär başqara alaçaq. Ul bu nisbättän Awrupada Amsterdamnan soñ ikençe aêroport bulaçaq. Yaña pist yärdämendä hawa transport xäräkäteneñ ütkärü mömkinlege säğatenä 120 oçqıçqa citäçäk. Xäzergä älege kürsätkeç - 80.
“Sabax” gazetı xäbär itkänçä, “Flying Fox Törkiyägä kilde”.
Dön’yanıñ iñ ozın yaxtaları arasına kerüçe “Flying Fox” Muğlanıñ Marmaris töbägenä kilde. Korab Datça tarafınnan kerä. Yaxtada Rusiyäneñ iñ bay keşelärennän Dmitriy Kamençiknıñ buluı bilgele. Monnan tış, anda Angliyä, Franśiyä häm Ukrainadan da qunaqlar bar.
“Xörriyät” gazetı yazğança, “Anadolu Êfes Awrupa Ligasınnan büläk aldı”
Anadolu Êfes basketbol klubı Awrupada iñ yaxşı menedjerlıq ütkärüçe komandalarnı bäyäläwçe “Awrupa ligası menedjerlıq premiyäläre” tarafınnan birelüçe kömeş büläkneñ iyäse buldı. Quyı zäñgär - aq töslärgä iyä klubtan yasalğan belderügä qarağanda, barlığı 40 komandanı bäyälägännär. Altın büläkne Litvanıñ “Zalgiris”, bronzanı isä Germaniyäneñ “Bayern Münih” komandaları ala.
