Törek matbuğatına küzätü 15.02.2019
15 nçe fevral' könne basılıp çıqqan qayber törek gazetlarına küzätü
“Sabah” gazetınıñ “Terror koridorına röxsät yuq” isemle yazmasınnan kürengänçä, Soçida Törkiyä, Rusiyä häm İran liderları qatnaşında öç’yaqlı sammit uzdı. Anda Törkiyä ilbaşı Räcäp Tayyip Ärdoğan, Rusiyä Federaśiyäse däwlät başlığı Vladimir Putin häm İran ilbaşı Xasan Ruxani Süriyä mäs’äläsen urtağa salıp söyläşte.
Liderlar Süriyädä separatist programmalarğa qarşı toruda qatğıy buluların belderde.Öç ilbaşı älege däwlätneñ bäysezlege, berlege häm cir bötenlege öçen nıq toraçaqların assızıqladı. Alar AQŞ xärbi köçläre Süriyädän çıqsa ilneñ totrıqlılıq häm iminlege köçäyäçäk digän fikerdä. Törkiyä ilbaşı Ädoğan “Çigenüne “YPG/PKK” häm “DEAŞ” faydalana almayaçaq räweştä alıp baru kiräk. Terror koridorına röxsät birmäyäçäkbez”dide.
”Vatan” gazetı ”Akarnıñ möhim cıyılışları” isemle xäbärendä Törkiyä saqlanu ministrı Hulusi Akarnıñ kiçä Rusiyäneñ Soçi qalasında Rusiya Federaśiyäse saqlanu ministrı Sergey Şoygu häm İran ğomum ştab başlığı Möxämmäd Bageri belän söyläşülär ütkärüen belderä.
Süriyä temalı 4 nçe öç yaqlı sammittan êlek ütkärelgän oçraşularda Süriyädäge soñğı wäzğiyt’ xaqında süz bardı.
”Star” gazetı “Tışqı êşlär ministrlığı Tön’yaq Makedoniya xalqınıñ qayğısın urtaqlaştı” isemle yazmasında Törkiyäneñ Tön’yaq Makedoniya başqalası Skop’yega yaqın cirdä küzätelgän yul hälakätendä şaqtıy keşeneñ ğomere özelü säbäple qayğınamä cibärüen xäbär itä.
Tışqı êşlär ministrlığınıñ bu xaqtağı belderüendä “Kiçä yulçı avtobusı qazasında 13 keşeneñ ülüe häm küp sanda keşeneñ yaralanuı borçu tudırdı. Qazada ğomere özelgän keşelärneñ ğailäreneñ häm Makedoniya xalqınıñ qayğısın urtaqlaşabız. Yaralanğan keşelärgä şifalar telibez”diyelä.
”Xäbär törek” gazetı ”Ağımdağı defiśit bilgele buldı” isemle xäbärendä Üzäk bank mäğ’lümatlarına kürä Törkiyädä dekabr’ ayında ağımdağı defiśit 1 milliard 44 million dollar buldı. Yıllıq ağımdağı defiśit isä 27 milliard 600 million dollar bularaq terkälde.
“Xörriyät” gazetnıñ “Ğaşıyqlar könenä 4 meñ tonna çäçäk” isemle yazmasında belderelgänçä, dön’yanıñ iñ tiz üsüçe hawa poçta markası iseme belän 124 ilgä xezmät kürsätüçe Turkiş Kargo Ğaşıyqlar köne uñayınnan 4 meñ tonna çäçäk taşıdı.
Törek hawa yullarınıñ matbuğat bülegennän yasalğan belderügä qarağanda, maxsus çäçäk säfärläreneñ soñğısı kiçä yasalğan. Alarnı Keniya başqalası Nayrobi häm Êkvatornıñ başqalası Kitoğa iltkännär. Bıyılnıñ 1nçe ğıynvarınnan 10nçı fevral’gä qadär dön’yanıñ törle poçmaqlarına 4 meñ tonna çäçäk iltelgän.
