Törek matbuğatına küzätü 21.11.2017

“Vatan” gazetı “Bez NATOnıñ xörmätkä layıq äğ’zası” isemle xäbärendä kiça Bäştäpädä ilbaşı Räcäp Tayyip Ärdoğan räislegendä ministrlar şurasınıñ cıyıluı turında yaza.

 Xäbärdän kürengänçä, yaqınça 2 säğät’ däwam itkän cıyılıştan soñ prem’yer-ministr urınbasarı häm xökümät süzçese Bäkir Bozdağ belderü yasadı häm sorawlarğa cawap birde.

Bozdağ Norvegiyadağı NATO xärbi künegülärendä küzätelgän cäncal belän bäyle bularaq “Bu waqiğa - Törkiyägä zıyan kiterü öçen NATOnı da kertep qayber platformalarnı qullanu telägeneñ naçar ürnäge. Törkiyä - NATOnıñ xörmätkä layıq ber äğ’zası. Monnan soñ da xörmät itelä torğan äğ’za bulaçaq”dide.

”Xäbär Törek” gazetınıñ “ İsmail Qahraman yänä parlament başlığı bulıp saylandı” isemle xäbärennän kürengänçä, kiçä parlament ğomum şurası saylaw öçen cıyıldı.

Berençe häm ikençe turda namzätlärneñ berse dä parlament başlığı bulıp saylanu öçen kiräkle äğ’za sanınıñ öçtän ikesenä ireşä almaw säbäple öçençe tur ütkärelde.

İsmail Qahraman öçençe tur tawışqa quyuda yänä Törkiyä Böyek Millät Mäclese başlığı bulıp saylandı.

Törkiyä ilbaşı Räcäp Tayyip Ärdoğan Qahramannı täbrik itte.

”Star” gazetı “Saroş qultığında ike depo blogı aktivlaşaçaq”isemle xäbärendä Törkiyä ênergetika häm tabiği çığanaqlar ministrı Bärat Albayraknıñ Törkiyä Böyek Millät Mäclesendä yasağan çığışında neft’ häm tabiği gaz importına bäylelekne kontrol’ astına alu kiräklegen belderep , bu qısada Hatay /Dörtyul häm Saros qultığında ike depo blogı häm yañadan gazlaştıru blogınıñ aktivlaşaçağı turında äytüen citkerä.

”Yäni Şafak” gazetı” Qayber yolalar YUNESKO yulında” isemle xäbärendä töreklärneñ iñ zur miraslarınnan bulğan häm bügenge köngä yuğaltuğa yöz totqan qayber tradiśiyälärneñ yuqqa çıqmawı öçen mädäniyat häm turizm ministrlığınıñ êşkä kereşüen uquçıları belän urtaqlaşa.

Gazet yazuınça, minstrlıq 4 törek mädäniyat mirasın saqlaw astına alu öçen YUNESKOğa möräcäğät’ itte. Älege mädäniyat mirasları: sızğıru tele, Dädä Korkut xikäyäläre, tradiśion törek uqçılığı, yaz kilüne qotlaw.

”Xörriyät” gazetı “Törek tortı berençe urınğa layıq buldı” isemle xäbärendä bursalı tort peşerü ostası Mätin Taşçınıñ Angliyädä ütkärelgän konditer äyberlär yärminkäsendäge bäygedä “Dönär,qızdırılğan it,töçe kümäç êşxanäse” isemle tortınıñ berençe urınğa, “Festival’ zalı” isemle  başqa ber tortınıñ isä ikençe urınğa layıq buluın citkerä.