Törek matbuğatına küzätü 15.11.2017

“Xörriyät” gazetı “Kuveytqa 3 kileşü” isemle xäbärendä Törkiyä ilbaşı Räcäp Tayyip Ärdoğannıñ Kuveytta räsmi söyläşülärdä qatnaşuın yaza.

Xäbärgä kürä Ärdoğan Kuveyt Ämire Şäyex Sabah äl Äxmät äl Cabir äs Sabah tarafınnan Kuveyt xalıqara hawa mäydanında räsmi tantana belän qarşı alındı. İke yaqlı häm wäkilleklärara söyläşülärdän soñ Bäyan sarayında oyıştırılğan imza tantanasında 3 mäs’älädä kileşü tözelde.

“Yäni Şafak” gazetı premyer-ministr Binali Yıldırımnıñ “DEAŞ” terror oyışmasınıñ Amerika Quşma Ştatları-Angliya citäkçelegendäge koaliśiya belän PYD operaśiyasendä Rakkadan çığarıluına qırıs reakśiya belderüen citkerä.

Xäbärdän kürengänçä partiyaseneñ törkem cıyılışında çığış yasağan Yıldırım: “Rakka belän bäyle xurlıq çıqtı. Närsälär genä bulmağan. Bumı aqıllı säyäsätegez? Bumı strategik xezmättäşlek?” – dide.

“Sabah” gazetı Siirt vilayäteneñ Äruh ilçäsendä 2014nçe yılda Könçığış Sadak-1 neft’ êzläw mäydanında yasalğan zondaj êşçänleklärendä Törkiyäneñ iñ sıyfatlı neften tabuın xäbär itä.

Xäbärgä kürä neft’ êzläw êşçänleklären arttırğan şäxsi şirkät 2 meñ 400 metrda 6 neft’ skvajinasına ireşte. Siirt vilayät’ idaräse başlığı Ali Fuat Atik Äruhnıñ terrorçılıq belän tügel, ä yaxşı xezmätlär, investiśiyalär belän telgä alınuın teläwlären belderep, Törkiyäneñ iñ sıyfatlı nefteneñ Äruh ilçäsendä êşkärtelüeneñ töbäkneñ sosio-iqtisadi qorılışın häm yazmışın üzgärtep, zur iqtisadi kerem täêmin itäçägen açıqladı.

Şul uq gazet Rusiyäneñ Däwlät atom-töş ênergetika oyışması “Rosatom” başlığı Aleksey Lixaçevnıñ Aqqoyı atom-töş köç üzäk stansiyaseneñ tözeleşendä cihaz belän täêmin itü häm tözeleş barışlarınıñ yaxşı uzuı zarurlığın belderüen yaza.

Gazet yazuınça Lixaçev: “Aqqoyı atom-töş köç üzäk stansiyasen citeşterü öçen Rusiyä häm Törkiyä tırışlıq quya. Bu maqsatqa ireşüneñ berdänber yulı rus häm törek tarafı arasında yaxşı koordinaśiyalängän häm ışanıç nigezendäge bulğan xezmättäşlek.”