Törek matbuğatına küzärü 07.04.2017

“Sabah” gazetı “Çerüçe qitğa – Awrupa” isemle xäbärendä Törkiyä ilbaşı Ärdoğannıñ Awrupanıñ demokratiya, keşe xoquqları häm ireklärneñ tügel, ä basım, qırıslıq, naśizmnıñ üzäge buluın äytüen yaza.

Xäbärgä kürä Törkiyäneñ Balıkäsir şähärendä xalıqqa möräcäğat’ itkän häm “Qarşıbızda här yaqtan çerep baruçı qitğa bar” digän ilbaşı tübändägeçä citkerde: “16nçı aprel’ könne ütkäreläçäk xökümät sistemasın da üz êçenä aluçı Töp qanun üzgäreşe referendumı yaqınayğan sayın Awrupa, terror oyışmaları häm Törkiyägä doşman bulğan dairälär aptırap qala. Barlıq tırışlıqlarına qaramastan tarixıbıznıñ iñ zur citäkçelek reformasına kirtä quya almayaçaqların añlağan sayın närsä êşlärgä belmilär.”

“Star” gazetı “Kandildä 5 urın yuqqa çığarıldı” isemle xäbärendä Törek qorallı köçläreneñ Ğiraqnın tön’yağındağı Kandil töbägendä oyıştırılğan hawadan operaśiyadä separatist PKK terror oyışmasına bäyle 5 urınnı yuqqa çığaruın citkerä.

Gazet yazuınça kiçke säğatlärdä alınğan xäbärlärdän soñ Törek hawa köçlärenä bäyle xärbi oçqıçlar Kandilgä hawadan xäräkät oyıştırdı.

Xäbärdän kürengänçä PKKğa bäyle buluı raslanğan 3 saqlanu häm 2 sıyınu urınına ut açıldı. Wazifaların uñışlı tämamlağan xärbi oçqıçlar imin räweştä bazalarına kire qayttı.

“Xäbär türk” gazetı “AQŞtan Süriyägä 59 raketa” isemle yazmasında Amerika Quşma Ştatlarınıñ Süriyä rejimınıñ Şayrat hawa bazasına 59 Tomahok raketası ırğıtuın yaza.

Xäbärgä kürä raketalar Humus yanında Şayrat hawa bazasında urın alğan radarlar, bombağa totu oçqıçları, oçqıç kiräk-yaraqları, oçqıçlarğa yağulıq täêmin itüçe stanśiyalär, logistik depolaw alannarın häm hawa saqlanu sistemaların maqsat itep alğan.

Gazet yazuınça raketa höcüme Urta diñgezgä urnaştırılğan ber Amerikan xärbi köymäsennän oyıştırılğan. Ut açılğan bazanıñ tınıç xalıqqa qarata oyıştırılğan ximik höcümdä qullanıluı uylanıla.

“Watan” gazetı Törkiyäneñ terrorçılıq belän köräş mäs’äläsendä Awrupa illärennän êçkersezlek kötüen uquçıları belän urtaqlaşa.

Xäbärgä kürä törek räsmi zatları soñğı berniçä yılda Awrupa illärendä terror höcüme oyıştırğan şaqtıy “DEAŞ” terror oyışması äğzasen höcüm başqarğançı Süriyägä barırğa cıyınğanda qulğa alıp, illärenä tapşırğan ide. Läkin bu terrorçılar Awrupa illäre tarafınnan irekkä cibärelde.

Gazet yazuınça 2015tä Parijda höcüm oyıştırğan terrorçı, Parijdağı höcümnärne planlağan keşe, Bryussel’dağı metro höcümen oyıştırğan terrorçı, Parijdağı tanılğan Notr Dam kafedralenä qarata bombalı höcüm yasarğa cıyınğanda qulğa alınğan “DEAŞ” äğzase bulğan xatın-qız terrorçı – bolardan qayberläre.

“Yäni Şafak” gazetı “Törek hawa yullarında yaña rekord” isemle yazmasında Törek hawa yulları ğomüm mödire Bilal Äkşineñ sośial’ media säxifäsennän bügen rezervaśiya yasatqan keşe sanın urtaqlaşıp: “Bu – rekord. Comğa könne 200 meñ 61 yulçıbız THYne sayladı,” – dip äytüen citkerä.

Xäbärgä kürä Äkşi Twitterda yasağan belderüdä: “Uñaylı häm imin säfärlär telibez,” – dide. Bilal Äkşi 31nçe mart könne dä 187 meñ 470 yulçınıñ THY belän säyäxät itär öçen rezervaśiya yasatuın citkergän ide.