Törek matbuğatına küzätü 24.03.2017
24nçe mart könne basılıp çıqqan qayber törek gazetlarına küzätü
“Xörriyät” gazetı “AQŞ häm Rusiyäneñ YPG belän bağlanışı bezne borçuğa sala” isemle xäbärendä Törkiyä ilbaşı Räcäp Tayyip Ärdoğannıñ Rusiyäneñ häm Amerika Quşma Ştatlarınıñ separatist PKK terror oyışması häm monıñ Süriyädäge törkeme YPGğa kürsätkän totışınıñ Törkiyäne borçuğa saluın belderüen äytüen yaza.
Xäbärdä ilbaşınıñ tübändäge süzläre urın ala: “Monı üzlärenä äytkänem kebek ap-açıq räweştä citkeräm. Bu cirlärneñ alardan arındırıluı kiräk. Alarnı rejim çaqırdı dilär. Här çaqıruğa cawap birmägez alaysa. Dönya säyäsätendä bu yuq. Kemne iñ küp tınıçsız itä bu, bezne tınıçsız itä. Minem 911 çaqrımlıq çigem bar. “DEAŞ” terror oyışması ut açtı, ber watandaşım, ber ğaskäriyem şähit buldı. Alar mondıy wazğiyättäme? Yuq. Moña bez qarar birerbez. Berkem dä “Törkiyä çigelsen” dip äytä almıy. Andıy närsä bula almıy.”
“Watan” gazetı “Törkiyä Rusiyäne iskärtte” isemle yazmasında Rusiyäneñ Änkaradağı wäqalätle zatınıñ Süriyädä Afrindän açılğan ut näticäsendä törek ğaskäriyeneñ şähit buluınnan soñ Törkiyäneñ Tışqı êşlär minisrlığına çaqırıluın citkerä.
Xäbärdän kürengänçä ministrlık süzçese Xösäyen Müftüoğlu tübändägeçä citkerde: “Üzenä başta bu waqiğanıñ citdi tınıçsızlıq tudıruı äytelde. Moña cawapnıñ qaytarıluı, monnan soñ oxşaş waqiğalarnıñ barlıqqa kilmäwe öçen kiräkle närsälärneñ başqarıluı zarurlığı, barlıqqa kilgän oçraqta terror oyışmasına şundıy uq cawapnıñ qaytarılaçağı citkerelde.”
Gazet yazuınça Müftüoğlu töbäktäge bozu oçraqların küzätüdän Rusiyä cawaplı bulğanı öçen Rusiyä wäqalätle zatınıñ çaqırıluın belderde.
“Yäni Şafak” gazetı “500dän artıq investor İstanbulda” isemle xäbärendä Farsı qultığı investorlarınıñ Törkiyägä bulğan qızıqsınuınıñ könnän-kön arta baruın yaza.
Xäbärgä kürä İstanbulda oyıştırılğan 12nçe Törek-ğaräp iqtisad forumında 500dän artıq cirle häm çit il investorına Törkiyädäge iqtisad anlatıldı.
Xäbärdä Törkiyägä kertelgän investisiyalärneñ uñdırışlılığın añlatqan çit il keşeläreneñ yaña investiśiyalär belän xezmättäşlekne arttıraçaqlarına işarät yasawları urın ala.
Xäbärdän kürengänçä premyer-ministr urınbasarı Mäxmät Şimşäk tä investorlarğa: “Törkiyäneñ zur maqsatları bar. Aşığığız,” – yullamasın yasadı. Törkiyä belän ğaräp illäre arasındağı säwdä külämeneñ bıyıl 70 milliard dollarğa citüe kötelä.
“Star” gazetı “Qaçaqlar draması AQŞqa añlatıla” isemle yazmasında Amerika Quşma Ştatlarında yäşäwçe 17 yäşlek Sinäm Oğuznıñ Törkiyädäge Süriyäle qaçaqlar urın alğan fotoräsemnärneñ ildä zur qızıqısınu kürüen uquçıları belän urtaqlaşa.
Xäbärgä kürä Oğuz töşergän räsemnär N’yu-Yorkta “40 yäştän keçkenä iñ aktiv 40 törek” büläk tapşıru tantanasında täqdir itelde. Sinäm Oğuz kürgäzmäneñ monnan alda Amerikan kongressında açıluın belderep, Törkiyäneñ qaçaqlarğa kürsätkän yärdämnären bar dönyağa citkerüne maqsat itüen açıqladı.
