Törek matbuğatına küzätü 14.08.2014

“Habärtürk” gazetı “Ğazzä öçen 135 telefon, 10 tapqır telekonferentsiya” isemle yazmasında Tışqı eşlär ministrı Äxmät Dawıtoğlunıñ Ğazzä krizisınıñ çişeleşe öçen Amerika Quşma Ştatları, Qatar häm Fälästin arasında alıp barğan söyläşü diplomatiyäse waqıtında 135 telefon söyläşüen häm 10 tapqır öç yaqlı telekonferentsiya ütkärüen yaza.

“Yäni Şafak” gazetı “18 Fälästinle däwalanu öçen Törkiyädä” dip atalğan yazmasında İzrailneñ Ğazzä höcümnärendä yaralanğan fälästinlelärdän tağın 18eneñ däwalanu öçen çärşämbe könne Ankarağa kiterelüen xäbär itä. Gazet berse bala, berse balağa uzğan xatın-qız belän bergä 18 yaralanuçınıñ däwalanaçaq xastaxanägä aşığıç yärdäm maşinası häm aşığıç yärdäm boralağı belän alıp barıluın belderä.

Gazet TİKA törki xezmättäşlek häm koordinatsiya agentlığınıñ da öyläre cimerelgän Ğazzä xalqı öçen ber meñ cıyılma toraq salu qararına kilüen assızıqlıy. Yazmada Premyer-ministr urınbasarı Ämrullah İşlärneñ: “Törkiyä Ğazzäne yañadan tözekländeräçäk. Tel häm din ayırımlılığın yasamıyça, cäberlängän keşelärneñ yanında bulırğa däwam itäçäkbez”, - dip äytkän süzlären citkerä.

“Sabah” gazetı “Milli İminlek Şurasında ike İlbaşı” dip atalğan yazmasında İlbaşı Abdullah Gül soñğı tapqır räislek itkän Milli İminlek Şurasında İlbaşı bulıp saylanğan Premyer-ministr Räcäp Tayyip Ärdoğannıñ da soñğı tapqır Premyer-ministr bularaq qatnaşuın yaza. Gazet cıyılışta ildäge häm dönyadağı täräqqiyätlärneñ tikşerelüen assızıqlap äytep uza.

“Vatan” gazetı “Ber könlek yulçı 90 meñ çigen uzdı” isemle yazmasında İstanbul Sabiha Gökçän xalıqara mäydanınıñ ber könlek yulçı sanında bügengä qädärge iñ yuğarı sanına avgust ayında öçençe märtäbä ireşüen belderä.

Gazet moñarçı 3nçe häm 9nçı avgust könnärendä ber könlek yulçı rekordı quyılğan hawa mäydanında 11nçe avgust könne tuplam 90 meñ 336 yulçınıñ kerep-çığuın yaza. Yazmada şul uq waqıtta bıyıl berençe cide ayda Sabiha Gökçän xalıqara maydanınnan cämğise 13 million yulçınıñ kerep-çığuı äytelä. Gazet bu räweşle ğinwar-iyül aylarında tuplam yulçı sanınıñ uzğan yılnıñ şul uq çorına qarağanda 31% artqan buluın assızıqlıy.

“Akşam” gazetı “Legendar başlıq Säbanı yuğalttıq” dip atalğan yazmasında Törkiyäneñ “Bäşiktaş” futbol taqımınıñ tarixına altın xäreflär belän yazılğan maqtawlı başlığı Söläyman Säbanıñ 88 yäşendä wafat buluı turındağı xäbärne citkerä. Yazmada Säbanıñ 16 yıllıq räislege waqıtında 22 kuboq yawlap, klubnıñ simvolı buluına iğtibar yünältelä.