Törek matbuğatına küzätü 07.08.2014

“Sabah” gazetı “İzrail Ğazzädä 412 bala üterde” isemle yazmasında Fälästin sälamätlek saqlaw ministrlığınıñ İzrailneñ Ğazzägä yaqınça ber ay buyı oyıştırğan höcümnärendä 412 balanıñ häläq buluın, 2 meñ 877 balanıñ da yaralanuın belderüen citkerä.

“Yäni Şafak” gazetı “Ğazzägä hawa yulı” dip atalğan yazmasında Törkiyä Tışqı eşlär ministrı Äxmät Dawıtoğlunıñ Fälästinle yaralanuçılarnıñ Törkiyägä kiterelüe öçen tırışuların äytüen yaza. Gazet monıñ öçen Törkiyä belän Ğazzä arasında hawa yulınıñ qorıluın täqdim itülären belderüçe Dawıtoğlunıñ: “Bu qısada Misır häm İzrail belän söyläşäbez”, - dip äytüen assızıqlıy.

“Vatan” gazetı “İstanbul 6 million yarım turistnı qunaq itte” isemle yazmasında İstanbulğa cide ayda uzğan yılnıñ şul uq çorına qarağanda 11.4% artış belän dönyanıñ dürt ber poçmağınnan 6 million 538 meñ 273 turistnıñ kilüen belderä. Gazet İstanbul mädäniyät häm turizm mödirlege mäğlümatlärenä kürä, şahärgä kilgän çit il keşese sanınıñ da uzğan yılnıñ şul uq ayına qarağanda 24.3%qa artuın yaza.

“Hürriyät” gazetı “Pekin kitap yärminkäseneñ däräcäle qunağı Törkiyä” isemle yazmasında Törkiyäneñ bıyıl 27nçe häm 31nçe avgust könnäre aralığında Qıtayda oyıştırılaçaq Pekin xalıqara kitap yärminkäsendä däräcäle qunaq bularaq qatnaşaçağın xäbär itä.

“Sabah” gazetı “Prostatqa qarşı yaña qan sınawı qamilläşterelde” dip atalğan yazmasında Amerika Quşma Ştatları belgeçläreneñ täcribäse turında mäğlümat birep uza.

“Habärtürk” gazetı “Qoyrıqlı yoldızdan berençe fotosürät” isemle yazmasında 10 yıl elek oçırtılğan “Rosetta” ğaläm qorabınıñ, 6 milliard çaqrım yul uzıp, Çuri kometasına barıp citüe häm berençe fotosürätlären cibärüe turındağı xäbärne citkerä.

“Milliyät” gazetı “Demba Ba oçırdı” isemle yazmasında Bäşiktaş taqımınıñ Çempionnar ligasınıñ öçençe saylap alu matçında Hollandiyada (Niderlandta) 2-1isäbe belän ciñgän “Feyenoord” komandasın İstanbulda da 3-1 isäbe belän ciñgän matçın añlata.