Ğaşura

Bügen dön’yanıň iň êlekke tatlı rizığı turında süz alıp barırbız. İseme – ğaşura. Boday, fasol’, nohıt, kürägä, injir häm törle çikläweklärne bergä qaynatıp yasaluçı ğaşuranı “Nux rizığı” dip tä atıylar. Çönki belgänebezçä tufannan soň Nux päyğambär häm yanındağılarnıň rizıqları betä başlağaç köymädägelär qalğan azıq-tölekne bergä qaynata häm ğaşura barlıqqa kilä. Törkiyädä hicri kalendar’ğa kürä Möxärräm ayı ğaşura ayı bulıp sanala. Bu aynıň 10nçı köne isä – ğaşura köne. Ğaşura peşkäç doğası uqıla, başta balalar häm awırularğa täqdim itelä, annarı kürşe-külän, dus-iş, tanış-beleşlärgä taratıla. Ğaşura Törkiyäneň yaqın geografiyasendäge illärdä dä bar. Greṡiyadä bu rizıqnı keşe ülgännän soň peşerälär, Ärmänstanda Raştua häm Yaňa yılda yasala ul.

Xäzer isä ğaşura öçen kiräkle rizıqlarğa tuqtalıyq:

2 stakan boday

3 stakan şikär qomı

Yartı stakan fasol’

Yartı stakan nohıt

Yartı stakan kipkän yözem

Yartı stakan urman çikläwege

4 kipkän injir

4 kürägä

Bizäw öçen koriṡa, ästerxan çikläwege, granat

İň êlek kiçtän boday, fasol’ häm nohıtnı suğa quyıp qaldırabız. İkençe könne bürtkän bodaynı 3 litr suda yomşarğançı peşeräbez. Şulay uq nohıt häm fasol’ne dä peşerergä kiräk. Fasol’ häm nohıtnı bodayğa quşıp, beraz tağın qaynatabız.

Şikär qomın häm yuılğan yözemne dä östibez. Annarı turalğan injir häm kürägäne quşabız. Tağın 5 minut peşergännän soň çikläwek salıp bolğatabız häm utta alabız.

Peşkän ğaşuranı qaynar kileş kasälärgä salıp çığabız. Suınğannan soň koriṡa, ästerxan çikläwege häm granat belän bizibez.

Aşlarığız tämle bulsın!