Awrupa iñ tiz cılınğan qıytğa buldı

Bötendönya meteorologiya oyışması belän Awrupa Berlegenä bäyle Kopernik klimat üzgäreşe xezmäteneñ "Awrupada klimat torışı 2022" isemle xisabı bastırıldı.

Xisaptağı näticälärgä kürä, 2022nçe yılda Awrupadağı urtaça hawa temperaturası bigräk tä qıytğanıñ könbatışındağı häm kön’yaq-könbatışındağı illärdä rekord êsselek bularaq terkälde. Cılılıq uzğan yılda barı tik İslandiyanıñ tön’yaq-könbatışı belän Türkiyäneñ keçkenä ber öleşendä urtaçadan beraz tübän ide.

İñ êsse cäy fazılın uzğan yılda yäşäwçe Awrupadağı şaqtıy ildä êsse hawa dulqınnarı kürengän bulsa, Angliyada hawa cılılığı berençe tapqır 40 gradusnı uzdı.

Uzğan yılğı urtaça cılılıq 1991nçe-2020nçe yıllar aralığınnan 0,79 gradusqa, 1961nçe-1990nçı yıllar çorınnan isä 1,83 gradusqa kübräk ülçälde.

Awrupadağı cılılıq här 10 yılda 0,5 gradusqa artqan. Bu 1980nçe yıllardan birle global’ cılınunıñ urtaça kürsätkeçennän ike märtäbä kübräk.

Hawa waqıyğaları uzğan yılda qıytğada 16 meñ keşeneñ ülemenä yul açqan. Bu keşelärneñ 99,6% êsse hawa dulqınnarı arqasında häläq bulğan.

Kopernik klimat üzgäreşe xezmäte direktorı Karlo Buontempo hawa temperaturasınıñ artuınıñ däwam itüen kötülären citkerde.

Buontempo çiktän tış êsse hawa dulqınarınıñ tağın da yışraq kürenäçägen häm tağın da köçleräk bulaçağın kürsätüçe ürnäkneñ tabıluına basım yasadı.