Maksim Oreşkin: “Türkiyä belän mönäsäbätlärdä tormışqa aşırılmağan zur potenśial bar”
Rusiyä İlbaşı Vladimir Putinnıñ yärdämçese Maksim Oreşkin, Türkiyä belän bik küp ölkädä möhim proyıktlarnıñ häm êşçänlekneñ alıp barıluın belderep: "Äle tormışqa aşırılmağan zur potenśial bar,” – dip äytte
Rusiyäneñ êlekke İq’tisadi üseş ministrı Oreşkin Sankt-Peterburg Xalıqara iq’tisad forumı qısalarında “Anadolu” agentlığınıñ sorawlarına cawap birde.
Türkiyä belän Rusiyä arasında möhim êşçänlek alıp barıluın iskärtep uzuçı Oreşkin: "Bik küp ölkädä zur êşçänlek alıp barıla. Bu ölkälärne dä härkem belä. Mäsälän, atom-töş ênergiyası, ike yaqlı säwdä häm oxşaş şaqtıy ölkädä tığız êşçänlegebez däwam itä,” – dip äytte.
Oreşkin, Türkiyä belän Rusiyäneñ "iğ’tibarnı cälep itüçe" küp sanda proyıktnı bergäläp däwam itterüenä işarät itep: "Min şunı açıq itep äytä alam: xezmättäşlegebezdäge buluı mömkin potenśialnıñ äle 50%ın da xätta tormışqa aşırmadıq,” – dip belderde.
Maksim Oreşkin, ike il yasayaçaq adımnarnıñ däwam itüen kötülären citkerep:
"Şuña kürä Rusiyä belän Türkiyä arasındağı üzara bäyläneştä bulğan böten forsatlarnıñ tormışqa aşırıluın täêmin itü öçen başqarılaçaq küp närsä bar. Monı başqarırğa tırışaçaqbız. Putinnıñ da, İlbaşı Räcäp Tayyip Ärdoğannıñ da bu mäs’älädä ixtıyarları bar, bik kiñ qırlı häm bik yış söyläşülär ütkärälär, böten bu mäs’älälärne kiñäşläşälär. Min dä wazıyfadaşlarım belän şuşı yünäleştä êşlim. Kiläçäkkä qarağan häm älegä tormışqa aşırılmağan zur potenśial bar,” - dip iskärtep uzdı.
