Rusiyäneñ Qara diñgez aşlıq kileşüenä kire qaytuı
Rusiyä Qara diñgez aşlıq kileşüeneñ yañadan başlanuın iğ’lan itte
Küpçelek keşene tınıçlandırğan alğarış buldı häm Ukraina portlarınnan aşlıq cibärelüen küzdä totqan Qara diñgez kereşüe yañadan başlandı.
Şaqtıy il Ukrainanıñ Qara diñgezdäge portlarınnan kitep Bosfor buğazınnan uzğan şuşı bik möhim azıq-tölek produktlarınıñ importına tayanğan wazğıyättä.
Bu barış Rusiyäneñ şimbä könne kileşüdä qatnaşuın tuñdıruın açıqlawı belän risk astına kergän ide. Rusiyä bu açıqlawnı Qırımdağı diñgez flotın nişan itep alğan häm turıdan-turı Ukrainanı cawaplı itep totqan höcümnän soñ yasadı.
Tığız diplomatik tırışular şomlı sularnı xäzerge waqıtta tınıçlandırğan kebek kürenä.
Räcäp Tayyip Ärdoğan, Türkiyä İlbaşı:
“Bez Putin belän kiçä ütkärgän söyläşüdän soñ Rusiyä saqlanu ministrı Şoygu Milli saqlanu ministrıbız Hulusi Akarğa şaltıratıp bügen säğät 12.00dän soñ aşlıq cibärelüeneñ moña qadär planlaştırılğanı kebek däwam itäçägen belderde. Putin belän kileşkänebez kebek berençe çiratta Somali, Cibuti häm
Afrikadağı fäqıyr illär öçen bu koridornı êşlätäçäkbez”.
Rusiyä häm Ukraina dönyanıñ iñ zur boday êksportyorlarınnan. Türkiyä häm BMO şuşı kileşügä iyül’ ayında aradaşçı bulğan ide.
NATO, Awrupa Berlege häm Amerika Quşma Ştatları Rusiyäneñ qatnaşunı tuqtatıp toru qararın citdi räweştä gäyıplägän, Rusiyäne azıq-tölek produktların qoral bularaq qullanuda gäyıplägän ide.
Xäzer isä Rusiyä Ukrainadan telägän garantiyälärne aldı.
Vladimir Putin, Rusiyä İlbaşı:
“Ukrainadan mondıy höcümnär qabat bulmayaçaq digän garantiyanı bezgä birüen, humanitar koridorlarnıñ xärbi maqsatlar öçen qulllanılmawın taläp ittek.
Törek urtaqlarıbız bu wazğıyätne anıqlaw mäs’äläsendä aradaşçı buldı häm Saqlanu ministrlığıbız aradaşçılığı belän törek tarafınnan Ukrainanıñ mondıy garantiya birüe, humanitar koridorlarnıñ xärbi maqsatlar öçen qullanılmayaçağı turında bezgä mäğ’lümat kilde.”
Töp borçılu azıq-tölek bäyäläreneñ kinät kütärelüe ide.
Bu yıl başında bodaynıñ bäyäse Ukrainadağı bäreleşlär arqasında iñ yuğarı däräcägä citkän ide. Düşämbe könne isä soñğı öç aynın iñ yuğarı däräcäsenä kütärelde. Fäqät Rusiyäneñ belderüennän soñ bäyälär global’ bazarlarda kinät töşä başladı.
Kileşü xäzerge torışı belän 19nçı noyabr’gä xätle ğamäldä bulaçaq. Bu datada isä diplomatik tırışular çın mäğ’näsendä başlanaçaq.
Kileşüneñ betüe dönyanıñ aldınğı iq’tisadları İndoneziyada G20 sammitı öçen cıyılaçaq waqıtqa turı kilä.
Francis Collings, TRT World, Änkara
