Amerikada krizis: Bayden idaräse anıñ oçına çığa alırmı?

Bu küreneş Los-Anjeles sulıqlarında berniçä atna däwam itä: şıplap tulğan yök köymäläre portqa barıp yöklären buşata almıy.

Los-Anjeles portınıñ wäqalätle mödire Gene Seroka:

-Aziyadan Amerika Quşma Ştatlarına häm tağın da êçtäge portlarğa kitüneñ iñ qısqa yulı Los-Anjelestan ütä. Xäzer härkem bu yuldan buldıra alğan qadär faydalanırğa tırışa. Tik bu 10 yuldan baruçı maşinalarnı ber yulğa sıydırırğa tırışuğa oxşıy.

Moña östäp, skladlar da küptän tulğan. Tovarlarnı ilneñ ber oçınnan ikençesenä taşıyaçaq yök maşinası sanında da zur citeşmäwçelek bar. Näticädä bu kiştälärdä tovarlarnıñ kimüe häm bäyälärneñ artuına kiterä. İnflyaśiya xäzer citdi borçu çığanağına äwerelde.

Öç ay êlek Qıtaydan AQŞnıñ könçığış yarlarına standart zurlıqlağı ber konteyner cibärüneñ bäyäse 11 meñ dollar ide. Xäzer 21 meñ dollarğa citte. Bu bäyälärdä 89% üseş dimäk. Kliyentlar problemanı inde xäzerdän ük xis itä başladı. Satıp aluçılar kibetlärdä bäyälärneñ äkrenläp tügel, kisäk artuınnan zarlana.

Djon Braun, Vaşington:

-Êşlär bu xälgä niçek kilde? Pandemi waqıtında êşxanälärneñ ber öleşe citeşterüne tuqtattı. Xökümät iq'tisadnı keşelärgä berni êşlämägän kileş kompensaśiya tüläp ayaqta tottı. İq'tisad êlekkegeçä tulısınça açılğaç, keşelär bu aqçaların totarğa teläde.

Heritage waqıfı tikşerenüçese Djoêl' Griffit:

-Taläp çiktän tış arta başladı. AQŞta waqlap satuda rekord yasaldı. Bu basılğan häm burıçqa alınğan aqçadan çıqqan yasalma taläp. Bolar barısı üz ğomerebezdä kürgän iñ zur täêminat çılbırı krizisı belän tögällände.

Krizis xäzer dön'yanıñ zur öleşen yoğıntısı astına aldı. Tik başqa illär dön'yadağı iñ zur iq'tisad bulğan AQŞnıñ bu problemanı çişäçägen kötä. Bayden idaräse AQŞtağı portlarnı atnada 7 kön häm 24 säğat' êşlärgä künderde. Tik problemanı beterü êşeneñ aylar buyı baraçağı farazlana.

Djon Brain, TRT World