Tatarstan xäbärläre 37/2023

Tatarstan Räise “Ğailä tarixında ğasırlar awazı” festivalenda buldı

15 nçe may – Xalıqara ğailä könendä Tatarstan Räise Röstäm Miñnexanov “Ğailä tarixında ğasırlar awazı” festivalendä buldı. Ul bu xaqta üzeneñ Telegram - kanalında yazdı.

“Ber-bereñne xörmätläp, ğoref-ğadätlärne buınnan-buınğa tapşırıp, kiñäş-tabış itep yäşäwçe ğailälärneñ çığışların qaradıq. Xalıqara ğailä köne bäyräme belän çın küñeldän qotlıym. Barlıq ğailälär dä bäxetle bulsın. Bäyräm belän!”,- dip yazdı Röstäm Miñnexanov.

Xalıqara ğailä köne 1994 nçe yıldan başlap yıl sayn 15 nçe mayda uzdırıla. Anı Berläşkän Millätlär Oyışmasınıñ General’ assambleyası ğamälgä quyğan.

Tatarstanda xäläl produkśiya êksportı artqan

Soñğı öç yılda Tatarstanda xäläl produkśiya êksportı 20 tapqır artqan.

Tatarstan awıl xucalığı häm azıq-tölek ministrı urınbasarı Röstäm Gaynullov süzlärenä qarağanda, Tatarstan 2019 nçı yıldan xäläl tarmağın üsterü êşen aktiv alıp bara.

“ 2019 nçı yılda êksport küläme 300 meñ dollar ide, 2022 nçe yılda 6 million 500 meñ dollarğa citte. 2023 nçe yılda 8 million dollar kürsätkeçenä citärgä uylıybız” dip belderä ministr urınbasarı.

19-21 nçe mayda Qazanda “Russiya Halal Market” uza. “Qazan” agrosänäğat’ parkında Tatarstan, başqa töbäklär häm illärneñ xäläl produkśiyäse täq’dim iteläçäk.

Qazanda “Rusiya - İslam dön’yası: KazanForum” Xalıqara iq’tisadi forumı uza

Qazanda 18-19 nçı may könnärendä “Rusiya - İslam dön’yası: KazanForum” Xalıqara iq’tisadi forumı uzaçaq. Älege zur waqıyğa 200 dän artıq çaranı üz êçenä ala, alarda Rusyädän häm möselman illärennän 15 meñ keşe qatnaşaçaq.

Rusiya Federaśiyäse däwlät başlığı Vladimir Putin qararı nigezendä “Rusiya - İslam dön’yası: KazanForum” Xalıqara iq’tisadi forumı federal’ statusqa iyä buldı. Bıyıl çarada Aziya häm Yaqın Könçığış illäre, Türkiyä, İndoneziya, İran, Misır, Katar, Berläşkän Ğaräp Ämirlekläre,Üzbäkstan, Azärbaycan häm Tacikstan delegaśiyäläre qatnaşa.

Qazanda Bötenrossiya tatar din ähelläre cıyını uzdırıla

19-21 nçe may könnärendä Qazanda Bötenrossiya tatar din ähelläre cıyını uzdırıla. Cıyın bıyıl 13 nçe märtäbä oyıştırıla. Çarada Rusiyäneñ 80 nän artıq töbägennän meñläp delegat qatnaşuı kötelä. Cıyın “Milli tormış häm din” iseme astında ütkärelä. Cıyın programması 3 könlek itep tözelgän. 19 nçı may Qazan Êkspo kürgäzmä üzägendä cıyınnıñ açılışı, annarı "Russia Halal Êxpo” kürgäzmäsendä qatnaşu planlaştırılğan. 20 nçe may könne Tatarstan Räise Röstäm Miñnnexanov qatnaşında cıyınnıñ plenar utırışı bula. 21 nçe may könne delegatlar “İzge Bolğar cıyını” qunaqları bulaçaq. Bötenrossiya tatar din ähelläre şul uq könnärdä Qazanda uzaçaq “Rusiya - İslam dön’yası: KazanForum” 2023 Xalıqara iq’tisadi forumda da qatnaşaçaq.

21 nçe may könne “İzge Bolğar cıyını” ütkärelä

21 nçe may könne Bolğarda İslam dinen räsmi qabul itügä bağışlanğan “İzge Bolğar cıyını” ütkäreläçäk. Cıyında Päyğambärneñ yadkar’lärennän kürgäzmä oyıştırılaçaq. Tatarstan mädäniyät ministrı urınbasarı Damir Natfullin süzlärenä qarağanda, “İzge Bolğar cıyını”na berençe tapqır Päyğambär s.g.v yadkar’läre qaytarılaçaq. Kürgäzmä zalına Päyğambärebezneñ 10 yadkäre quyılaçaq.

Cıyın däwamında Bolğar däwlät tarix-arxitektura muzey-tıyulığında kürgäzmälär,ostaxanälär êşläyäçäk.

Qunaqlarnıñ mädäni programma,Tatarstan xalıq sänğat’ käsepläre ostalarınıñ êşlänmäläre kürgäzmäse ,bilbaw köräşe buyınça turnir qaraw mömkinlege bulaçaq. Barlıq teläwçelär ğaräp kalligrafiyäsendä yazarğa öyränü buyınça ostaxanädä qatnaşa ala.

“İzge Bolğar cıyını” Bolğarda 1989 nçı yıldan birle ütkärelä. Ul 922 nçe yılda İdel buyı bolğarlarınıñ İslam dinen däwlät dine bularaq qabul itü köne häm Bolğar xanı Almuşnıñ ğalim İbn-Fadlan citäkçelegendäge Bagdad xälife delegaśiyäse belän oçraşuı istälegenä uza.

Bügenge çığarılışta Tatarstan Räiseneñ matbuğat xezmäte belän “Tatar-inform” xäbär agentlığı yazmaları qullanıldı.