Tatarstan xäbärläre 30/2023

Ästerxan yanında Bötenrusiyä Saban tuyı öçen tatar işeğaldı tözilär

Ästerxan yanında XIII Bötenrusiyä awıl Saban tuyı öçen may ayında mädäni-êtnografik mäydançık açılırğa tiyeş.

Moña Tatarstan byudjetınnan 12 million yarım sum aqça bülep birelä. Bu xaqta töbäk internet portalına tayanıp Bötendönya tatar kongressı matbuğat xezmäte xäbär itä.

Plan buyınça, tatar işeğaldında zur bulmağan muzey, milli bizäkle yort, miç, qoyı, küper urnaşaçaq. Şulay uq mäçet tözeläçäk. Kileşüne başqaruçığa näq menä Tatarstanda citeşterelgän materiallar häm êşlänmälärne qullanırğa täqdim itelde. Ästerxan ölkäse gubernatorı İgor’ Babuşkin bu çaranıñ kiñ külämle bulaçağı turında berniçä tapqır bilgeläp ütte. Ul 27 may könne bulaçaq.  

Qazan “Rusiyäneñ mädäni başqalası” isemenä däğwa itä

“Watanım Tatarstan” citkergänçä Qazan “Rusiyäneñ mädäni başqalası” isemenä konkursta qatnaşırğa cıyına. “Tatar-inform” agentlığında uzğan jurnalistlar belän oçraşu waqıtında Tatarstannıñ viŝe-prem’yerı Läylä Fazlıyeva şul xaqta xäbär itte.

Läylä Fazlıyeva äytüençä, ğariza tapşıru kampaniyase 2025 yılda uzaçaq. İskärtep ütik: bu waqıtta respublika başqalası 1020 yıllığın bäyräm itäçäk.

Konkurska 2023 yılda start bireläçäk. Yıl sayın belgeçlär Rusiyäneñ berär şähärenä älege maqtawlı isemne biräçäk.

Tatarstanda “Ramazan – igelekle êşlär ayı” tradiŝion xäyriyä marafonı start aldı

Tatarstanda möselmannar öçen izge aynıñ berençe könendä “Ramazan – izge ğamällär ayı” digän tradiŝion xäyriyä marafonı başlandı.

Bu xaqta Bötendön’ya tatar kongressı matbuğat xezmäte xäbär itä.

Tatarstan möselmannarı Diniyä näzaräteneñ “Zäkyat” xäyriyä fondı awıru balalarğa qabat yärdäm itäçäk, äz keremle ğailälärne azıq-tölek belän täêmin itäçäk, soŝial’ iftarlar ütkäräçäk häm moxtaclar arasında fitır-sädaqa, fidiyä häm zäkyat cıyunı häm taratunı üzäkläşterelgän räweştä oyıştıraçaq.

Moxtaclarğa on, yarma, könbağış mayı, konservalar, şikär, makaron, çäy häm xörmä cimeşlären kertep, kim digändä 500 azıq-tölek cıyılması tapşırırğa planlaştıralar.

Qazannıñ 42 mäçetendä iftarlar uzaçaq. İftarnı üz isemeñnän oyıştırırğa yäki sponsor sıyfatında yärdäm itärgä mömkin, monıñ öçen mäçet imamnarına möräcäğat’ itärgä kiräk.

Şulay uq XI Respublika iftarı oyıştırılaçaq.

Bügen Qazanda iñ yaxşı näfis süz ostalarınıñ isemnäre bilgele bulaçaq

Bügen 28 mart könne Qazannıñ “Säydäş” mädäniyät üzägendä Tatarstan Respublikası Räise qarşındağı Tatar telen häm Tatarstan Respublikasında yäşäwçe xalıqlar wäkilläreneñ tuğan tellären saqlaw, üsterü mäs’äläläre komissiyase yärdäme belän “Tatarstan – Yaña Ğasır” teleradiokompaniyase oyıştıra torğan iñ masştablı bäygelärneñ berse – “TATAR SÜZE” öçençe Xalıqara näfis süz televizion bäygeseneñ Gala-konŝertı uzaçaq.

Bu xaqta “ŞAYAN TV” telekanalına sıltama belän Bötendön’ya tatar kongressı matbuğat xezmäte xäbär itä.

Konkurs tatar telen häm ädäbi mirasıbıznı propagandalaw, üsterü häm saqlaw, tatar klassik yazuçılarınıñ äsärlären populyarlaştıru, tatar ädäbiyatına häm mädäniyätenä qızıqsınu uyatu maqsatınnan oyıştırıla.

Bäyge dön’yanıñ törle töbäklärenä sibelep yäşäwçe böten tatar xalqında zur qızıqsınu uyattı häm 3 meñnän artıq ğariza qabul itelde.

Tatarstanda Nurixan Fättaxnıñ “Qırıq dürtneñ may ayında” äsäre nigezendä tatarça fil’m töşerä başlağannar

“Azatlıq radiosı” xäbärenä kürä film İkençe Dön’ya suğışında tılda xezmät quyğan xatın-qızlarnıñ awır häm qatlawlı yazmışına bağışlanğan. Fil’mnıñ prem’yerası 2024 yılnıñ martında bulırğa tiyeş.

Tatarstannıñ Arça, Layış häm Yuğarı Oslan rayonnarında tatarnıñ xalıq yazuçısı Nurixan Fättaxnıñ “Qırıq dürtneñ may ayında” äsäre nigezendä şundıy uq isemdäge fil’m töşerä başlağannar.

Bu fil’m ğomumkeşelek qıymmätlären taratuğa yünälderelgän, dip söylägän fil’mnıñ rejissyerı Aleksandr Dalmatov.

Töşerü öçen aqçanı Tatarstan mädäniyät ministrlığı belän Arça yaqtaşlar cämğıyäte birgän.