“Min Tatarça söyläşäm” häm Qazannan Almatığa säfär
Tatarstan xäbärläre – 03/2022
ТӨРКИЯ AШA ТAТAРCТAН ҺӘМ ДӨНЬЯ XӘБӘРЛӘРE / TÖRKİYÄ AŞA TATARSTAN HÄM DÖN'YA XÄBÄRLÄRE 19.04.2022 13:00 PODKAST
Qazan belän Almatı arasında poyızd säfärläre
Tatarstannan Qazaqstanğa yulçı poyızdları yöri başlıy. Bu turıda “Tatar-inform” agentlığı xäbär itä: “İyün’dä tağın biş poyızd yöri başlayaçaq: Almatı-Saratov, Qarağanda-Samara, Almatı-Novosibirsk, Qarağanda-Omsk, Almatı-Qazan”.
Qazaqstanğa yörüçe poyızdlar yaña tör koronavirus pandemiyası arqasında tuqtatılıp torılğan ide.
Qazaqstanğa kilgän barlıq yulçılar da “Kovid”qa tiskäre test näticälären yäki vakśinaśiya sertifikatın kürsätergä tiyış.
“Min tatarca söyläşäm” çarasında şağıyrlär bäygese
“Azatlıq” radiosı saytı xäbär itkänçä, 26nçı aprel’ – tatar xalıq şağıyre Ğabdulla Tuqay tuğan könendä Tatarstan başqalası Qazanda “Min tatarca söyläşäm” çarası uzaçaq. Bıyılğı çarada täwge tapqır yäş’ şağıyrlär bäygese dä oyıştırıla. Bötendönya tatar yäş’läre forumınıñ matbuğat üzäge beldergänçä: “Säxnädän tatar muzıkası ğına tügel, milli şiğriyät’ tä yañğırayaçaq.
“Min tatarça söyläşäm!” çarası bıyıl 17nçe tapqır uza.
Tatarstannıñ Çallı qalasında isä “Min tatarca söyläşäm!” akśiyäse 23nçe aprel’dä ütkärelä. İkençe yıl rättän bu çara Çallınıñ tatar drama teatrı binasında oyıştırıla.
Tatar tele häm ädäbiyatı xalıqara olimpiadası
Tatarstan başqalası Qazanda tatar tele häm ädäbiyatınnan 9nçı Xalıqara olimpiada başlandı. “Tatar-inform” agentlığı citkergänçä, olimpiadada Törkiyäneñ İskeşähär qalasınnan Ğamzä Nur Nalbant ta turıdan-turı qatnaşa.
Qazaq telen dä belüçe Gamzä Nur tatar telen häm Tatarstannı yaratuın, tatar dusları belän kön sayın tatarça aralaşuın häm tatar grammatikası kitapların uqıp olimpiadağa äzerlänüen äytte.
Xäbär agentlığı beldergänçä, Gamzä Nur Nalbant – Xalıqara olimpiadağa çit ildän kilgän berdänber qatnaşuçı. Qalğan çit il qatnaşuçıları (Awstraliyadan, Qazaqstannan, Qırğızstannan häm Törkiyädän) tatar tele olimpiadasında onlayn qatnaşa.
Tatar tele häm ädäbiyatı xalıqara olimpiadası 2012nçe yıldan birle Tatarstan mäğarif häm fän ministrlığı tarafınnan yıl sayın ütkärelä.
Bıyıl olimpiadada Tatarstannan 280, Rusiyä Federaśiyäseneñ 27 töbägennän 150 uquçı, yuğarı uqu yortlarınnan 46 student häm 5 çit ildän 15 qatnaşuçı köç sınaşa.
Törkiyä başqalasındağı fotokürgäzmädä tatar fotografı
“Tatar-inform” agentlığı Törkiyä başqalası Änkarada tatar fotografı Mäsut Arslanbäk qatnaşında oyıştırılğan fotosürät kürgäzmäse turında xäbär itä.
Törkiyä başqalasında yäşäwçe millättäşebez, fotorässam Mäsut Arslanbäkneñ fotosürätläre Änkarada Çikläwlärsez fotosürät cämğıyäte (ENFOD) kürgäzmäsendä täq’dim itelä.
16nçı aprel’dä açılğan “Portret ostaxanäse” dip atalğan kürgäzmädä millättäşebezneñ ike xezmäte urın alğan. Anda barlığı cide fotografnıñ portret janrındağı fotografiyäläre urnaştırılğan.
Mäsut Arslanbäk 1956nçı yılda Änkarada Yaponiyadän küçengän tatar ğailäsendä dönyağa kilgän. İngliz filologiyäse bülegen tämamlağan. Ozaq yıllar Törkiyä Böyek Millät Mäclese (parlament) tışqı êşlär departamentında tärcemäçe bulıp êşlägän. Şul çaqta uq fotosürätkä töşerü belän mawıqqan.
“Layıqlı yalğa çıqqaç fotosürät sänğate belän nıqlap şöğıl’länä başladım. Kübräk aqlı-qaralı fotografiyälär töşerergä yaratam. Soñğı 15-16 yılda peyzaj häm portret janrlarında êşlim,” – di Mäsüt Arslanbäk.
Çikläwlärsez fotosürät cämğıyäteneñ “Portret ostaxanäse” dip atalğan kürgäzmä 23nçe aprel’gä qadär däwam itäçäk.
Azärbaycanda Tuqay kiçäse
Azärbaycanda Ğabdulla Tuqay icatına bağışlanğan çara buldı.
17nçe aprel’dä Tatarstannıñ Azärbaycandağı Daimi wäkilçelegendä böyık tatar şağıyre, cämäğät êşleklese häm tärcemäçe Ğabdulla Tuqaynıñ 136 yıllığına bağışlanğan çara uzdı. Çaranı “Aq qalfaq-Baqı” tatar xatın-qızları cämğıyäte oyıştırdı.
Anda oyışma räise Saniya Al’myaşeva şağıyr’neñ biografiyäse häm anıñ awır yazmışı turında söyläde. Bu turıda Tatarstannıñ Azärbaycandağı Daimi wäkilçelegeneñ matbuğat xezmäte xäbär itä.
“Qardäş qalämnär”dä tatarlar
Törki dönyası ädäbiyat jurnalı Ğalimcan İbrahimovqa bağışlanğan mäqalä bastırdı. “Tatar-inform” agentlığı xäbärçese Ruşaniya Altay beldergänçä, Törkiyädä çığuçı törki dönyası urtaq ädäbiyat basması – “Qardäş qalämnär” jurnalınıñ soñğı sanında tuuına 135 yıl tulu uñayınnan tatar klassik yazuçısı Ğalimcan İbrahimov iskä alınğan. Bu uñaydan anda Çulpan Zaripova-Çätinnıñ mäqaläse basılğan.
Mäqalä “Törki dönyasınıñ ber mäktäbe: tatar yazuçısı Ğalimcan İbrahimov” dip isemlängän. Avtor tatar adibeneñ icatı häm êşçänlegenä bäyä birgän, törki xalıqlarğa yoğıntısın analizlağan.
Şuşı uq jurnal şulay uq Tatarstan yazuçılar berlege räise Rkail Zäydullanı 60 yäş’lek yubileyı belän qotlap, kürenekle şağıyr’, Tuqay isemendäge Däwlät büläge iyäse Zinnur Mansurovnıñ mäqaläsen dä bastırğan.
“Borçulı yöräk awazı” dip atalğan yazmada avtor şağıyr’, yazuçı, publiśist Rkail Zäydullanıñ icatına bäyä birgän. Ul anı törek uquçısına şağıyr’ bularaq qına tügel, prozaik, dramaturg, jurnalist häm tärcemäçe bularaq ta tanıtırğa tırışqan.
“2017nçe yılnıñ törki dönya ädäbiyat keşese” isemenä layıq kürelgän Zinnur Mansurov Tatarstannıñ xalıq yazuçısı Rkail Zäydullanıñ tärcemä ölkäsendä dä sınatmawın, dramaturg bularaq ta uñışlı icat itüen, p’yesalarınıñ Tatarstan teatrlarında säxnäläşterelüen yazğan, şulay uq xalıq ışanıçlısı bularaq qıyu êşçänlegen qalämgä alğan.
