Urta Aziya cömhüriyätläreneñ kön üzägendäge waqıyğalar

Ağımdağı yılnıñ 13nçe mayında Sämärqand şähärendä Aziya xatın-qızlar forumı oyıştırıldı. Üzbäkstan Senatı başlığı Tänzilä Narbayeva citäkçelegendä ütkärelgän çarada 100 yuğarı däräcäle idaräçe xatın-qız qatnaştı. Forum axırında Sämärkand deklaraśiyäse qabul itelde.

Qıtay xökümäte räise urınbasarı Lyu Gooçjun uzğan atnada Üzbäkstan, Qazaqstan häm Qırğızstanğa räsmi säfär yasadı. Ul 13nçe mayda - Üzbäkstan ilbaşı Şäwkät Mirziyayev, 16nçı mayda - Qazaqstan däwlät başlığı Qasıym-Cumart Toqayev häm 18nçe mayda Qırğızstan liderı Sadir Caparov belän küreşep söyläşte. Lyu Gooçjunnıñ säfärendä kübräk iq’tisadi mäs’älälär qaraldı.

Malayziya xökümäte räise Änwär İbrahim uzğan atnada Qırğızstan, Qazaqstan häm Üzbäkstanğa räsmi säfär yasadı. 15nçe mayda ul Bişkäk şähärendä Qırğızstan ilbaşı Sadir Caparov belän oçraştı. Ütkärelgän söyläşülärdän soñ ike il mönäsäbätlären üsterüne küzallawçı urtaq dokument imzalandı. 16nçı mayda Änwär İbrahim Astanada Qazaqstan däwlät başlığı Qasıym-Cumart Toqayev belän qara-qarşı häm delegaśiyälärara söyläşülär uzdırdı. 17nçe mayda isä Qazaqstan xökümäte räise Oljas Bäktänov häm Malayziya prem’yer-ministrı Änwär İbrahim qatnaşında ike ilneñ investiśiyä cıyılışı uzdı. Anda 350 million dollarlıq kileşülär imzalandı. Qazaqstan ilbaşı Qasıym-Cumart Toqayev Malayziyä xökümäte räisen aêroportta üze ozatıp cibärde. 17nçe mayda Änwär İbrahim Taşkentta Üzbäkstan ilbaşı Şäwkät Mirziyayev belän oçraştı. 18nçe mayda Sämärqandta Üzbäkstan-Malayziya êşlekle forumı uzdırıldı.

16nçı mayda Törekmänstan xalıq maslaxatı räise Gorbangulı Bärdemöxämmätov Tatarstanğa räsmi säfär yasadı. Başqala Qazanda ul Tatarstan räise Röstäm Miñnexanov, respublikanıñ täwge ilbaşı Mintimer Şäymiyev belän oçraştı. Gorbangulı Bärdemöxämmätov  “Rusiyä islam dön’yası: Qazan forumı 2024” xalıqara çarasında maqtawlı qunaq bularaq qatnaştı. Älege forumğa 80nän artıq ildän wäkillär kilde.

16nçı mayda Qazaqstanda Üzäk Aziya illäre Milli iminlek şuraları ğomum särqatipläreneñ berençe utırışı uzdı. Anda terrorçılıqqa qarşı köräş, çikara sularnı qullanu, transport häm ênergetika şikelle temalar kütärelde. Qazaqstan ilbaşı Qasıym-Cumart Toqayev cıyılışta qatnaşqan qunaqlarnı qabul itte. Ul söyläşüdä regiondağı däwlätlärne ber-bersenä yaqınlaştıraçaq “Üzäk Aziya - 2040” dokumentın bıyıl qabul itärgä planlaştıruların belderde.  

Qıtay tışqı êşlär ministrı Van İ 17nçe-18nçe mayda Tacikstanğa räsmi säfär yasadı. Ul biredä wazıyfadaşı Siracetdin Möxretdin häm ilbaşı İmamali Raxman belän oçraştı.   

Waqıyğalardan kürengänçä, dön’yadağı aldınğı däwlätlär Üzäk Aziya cömhüriyätlären berböten bularaq kürä başladı.