Tatarstan xäbärläre 21/2024

Miñnexanov İran prezidentınıñ üleme säbäple qayğı urtaqlaştı

İran prezidentı İbrahim Räisi faciğale hälak bulu säbäple Tatarstan Respublikası Räise Röstäm Miñnexanov qayğı urtaqlaştı. Bu xaqta respublika citäkçeseneñ matbuğat särqatibe Liliyä Ğalimova xäbär itä.

“Tatarstan Respublikasında İran İslam Respublikası prezidentı Säyed afände İbrahim Räisi häm Könçığış Azärbaycan provinśiyasendä boralaq hälakäte waqıtında anıñ belän bulğan keşelärneñ faciğale räweştä hälak buluı turındağı xäbärne tirän qayğı belän qabul ittelär,” – dip yaza Röstäm Miñnexanov telegrammada, İran xalqınıñ zur yuğaltu kiçerüen assızıqlap.

“Säyed İbrahim Räisi turında yaqtı istälek häm doğalar bezneñ yöräklärne härwaqıt yaqtırtır. Bu yuğaltunıñ açısın çın küñeldän urtaqlaşam. Tatarstan sezneñ häm tuğandaş İran xalqı belän bergä tirän qayğı kiçerä,” – dip yomğaqlıy süzen Miñnexanov.

Röstäm Miñnexanov İdel buyı Bolğar däwlätendä islam dinen qabul itü köne belän qotladı

Tatarstan Respublikası Räise Röstäm Miñnexanov İdel buyı Bolğar däwlätendä räsmi räweştä islam dine qabul itelü köne uñayınnan möräcäğat’ itte.

“Qaderle tatarstanlılar! Möxtäräm qunaqlar! Xörmätle watandaşlar!

Sezne kürenekle data – İdel buyı Bolğar däwlätendä räsmi räweştä islam dine qabul itelü köne uñayınnan ixlas qotlıym.

İdel buyı Bolğar däwlätendä islam dine qabul itelü könen bıyıl ixlas küñeldän doğa qılıp, dustanä oçraşular uzdırıp häm igelekle ğamällär belän bilgeläp ütärbez dip ışanam.

Hämmägezgä dä çın yöräktän bäxet, tınıçlıq häm iminlek telim! Böyek Watanıbız häm üzebez härçaq Allah räxmätendä bulsaq ide!” – diyelä qotlawda.

“Altın Minbär” Qazan xalıqara kinofestivale “Animaśion fil’m” nominaśiyase belän bayıdı

“Altın Minbär” Qazan xalıqara kinofestivale programmasında “Animaśion fil’m” nominaśiyase barlıqqa kilde.

“2024 yılda tulı metrajlı häm qısqa metrajlı näfis fil’mnar, tulı metrajlı häm qısqa metrajlı dokumental’ fil’mnar, şulay uq, “Milli konkurs” nominaśiyaläre yaña nominaśiya belän tulılanaçaq”, dip xäbär itä kinofestival’neñ matbuğat üzäge.

Moñarçı çarada animaśiya “Milli konkurs” êçendä yäki konkurstan tış kürsätelä ide.

Programmada 2022 yıldan da irtäräk çıqmağan mul’tfil’mnar qatnaşa ala.

“Altın Minbär” Qazanda 6-11 sentäbr’ könnärendä ütkärelä.

Ğarizalar 1 iyun’gä qadär qabul itelä.

Tatarstan uñışlı ğomer ozınlığı buyınça top-10 töbäk arasına kerde

2023 yıl yomğaqları buyınça Tatarstan Respublikası Rusiyä töbäkläre arasında uñışlı ğomer ozınlığı buyınça sigezençe urınnı yawladı.

Federaśiya sub’yektları reytingın Rusiyä xökümäte qarşındağı Finans universitetı tikşerenüçeläre tözegän.

Tatarstanda üz tormışlarınnan tulısınça yäki nigezdä qanäğat’ bulğannarnıñ öleşe 88 prośentnı täşkil itkän, ä urtaça ğomer ozınlığı 75,3 yılğa tiñ bulğan.

Näticädä, Tatarstan Respublikasında yäşäwçegä 65,9 yıl uñışlı ğomer turı kilä.

Ğomumän, Rusiyä buyınça uñışlı ğomerneñ urtaça ozınlığı 2018 yıldağı 55 yıldan 2023 yıldağı 60 yılğa qadär artqan.

“KAMAZ-Master” komandasınıñ iñ yäş’ sportıçısı altın medal’ aldı

“KAMAZ-Master” taqımınıñ iñ yäş sportçısı Bogdan Kärimov “Arçeda” uzışlarında ciñü yawladı. Ul böten êtaplarda da yaxşı kürsätkeçlär kürsätte. Finişka köndäşennän 9 minutka irtäräk kilde. Bu xaqta “Şähri Çallı” yaza.

Yök maşinaları arasındağı yarışlar Volgograd ölkäseneñ qomlı Arçedinsk-Donsk territoriyasendä uzdı. “KAMAZ-master” komandasınıñ töp köndäşe “MAZ-sportavto” buldı. İke taqımnan öçeşär êkipaj köç sınaştı.