Tatarstan xäbärläre 14/2024

Qazanda respublikaküläm iftar uzdı

İzge Ramazan ayınıñ ikençe unkönlegenä yomğaqlaw yasap, Tatarstan başqalası Qazanda respublika iftarı ütkärelde. Anda 12 meñ keşe qatnaştı. Törkiyä, Misır, Qatar şikelle çit illärdän kilüçelär dä bar ide. Awız açuda Tatarstan räise Röstäm Miñnexanov, Tatarstan däwlät kiñäşçese Mintimer Şäymiyev ta qatnaşa.

Respublika iftarın inde 12nçe tapqır ütkärälär. Bıyılğısı “Qazan Êkspo” xalıqara kürgäzmälär üzäge mäydançığında uza. Anı Tatarstan möselmannarı Diniyä näzaräte, “Aq Bars Arena” stadionı citäkçelege häm “Tuğan awılım” milli-turistlıq kompleksı oyıştıra. “3 tonna it, 1,5 tonna döge, 3 tonnağa yaqın yäşelçä, ciläk-cimeş, ber tonnağa yaqın kipkän cimeşlär äzerlände”,-di “Tuğan awılım” kompleksı citäkçese Radik Ğabdraxmanov.

Respublika iftarında mäcles qunaqların qarşı alu, cämäğat’ belän namaz uqunı oyıştıru, rizıq taratu häm axırdan öställärne cıyu öçen 700 volontyer cälep itelgän.    

Tatarstannıñ berençe prezidentınıñ şäxsi fotoğrafı Mixail Kozlovskiynıñ kürgäzmäse açıldı

29nçı martta Qazan Kremlendäge “Xäzinä” galereyasında ozaq yıllar ilbaşınıñ şäxsi fotoğrafı bulıp êşlägän Mixail Kozlovskiynıñ kürgäzmäse açıldı. Ul Tatarstannıñ atqazanğan mädäniyät xezmätkäreneñ tuuına 70 yıl tuluğa bağışlanğan. Qızğanıçqa, avtor inde arabızda yuq. Ul 2018nçe yılda wafat buldı.

Kürgäzmädä küp kenä fotolarnıñ geroyı - Tatarstannıñ berençe ilbaşı Mintimer Şäymiyev. Mixail Kozlovskiy 26 yıl anıñ belän bergä êşli. 200 foto arasında êlek berqayçan da kiñ cämäğat’çelekkä çığarılmağannarı da bar. Alarnı avtornıñ ulları Leonid häm Êmil’ ätiläreneñ arxiv plyenkaları häm negativlarında tapqan. Êşlärdä Tatarstanda cömhüriyät tözelgän waqıtlar, suverenlıq iğ’lan itkän çorlarnı da kürergä mömkin.

“Mixail Kozlovskiy. Däwer” fotokürgäzmäse 12nçe mayğa qadär açıq.

Alkogol’ satuda çikläwlär kertelä

Tatarstanda cämäğat’ tuqlanu ob’yektlarında isertkeç êçemleklärne satu waqıtın çiklärgä, şulay uq, sıra, medovuxa şikelle êçemleklärne satıp alırğa mömkin bulğan urınnar sanın kimetergä niyätlilär. Tatarstan räiseneñ şul xaqtağı qanun proyektı korrupśiyägä qarşı êkspertiza uza.

Küpfatirlı yortlarda häm alar tiräsendäge territoriyädä urnaşqan cämäğat’ tuqlanu ob’yektlarında kiçke säğat’ 10nan alıp irtänge 10ğa qadär alkogol’ produkśiyäse satu tıyılaçaq. Keçkenä kibetlärdä ul, ğomumän, satudan alınaçaq.

Proyekt qabul itelgän oçraqta, üzgäreşlär 2024nçe yılnıñ mayınnan üz köçenä keräçäk.  

Qazanda moxtaclarğa yärdäm cıyıldı  

Qazanda “İgelek kärzine” akśiyäse qısalarında 1052 kilo azıq-tölek cıyılğan. Alarnı sälamätlege yağınnan mömkinlege çiklängän keşelärgä, küp balalı häm az keremle ğailälärgä, şulay uq, xärbilärneñ yaqınnarına tapşıraçaqlar. Xäyriyäçelär ozaq saqlana torğan tovarlar: toqmaç, konserva, üsemlek mayı, çäy, käxwä, konfet häm başqa produktlar satıp alğan.

Akśiyälär respublikanıñ başqa şähärlärendä häm awıllarında da uzğan. “İgelek kärzine” çarası daimi räweştä ütkärelä.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.