Tatarstan xäbärläre 5/2024

Qazanda möselman mäktäbe tözergä cıyınalar

Qazan üzägendä xosusıy möselman mäktäbe häm balalar baqçası tözergä cıyınalar. Bu – Tatarstan Diniyä näzaräte proyektı. Ul 1200 balağa isäplänä häm êşmäkärlär aqçasına tözeler dip kötelä. Belgeçlär monı zur waqıyğa dip bäyäli. Bügenge köndä tatar telen saqlawnıñ töp yulı – xosusıy mäktäp oyıştıru di alar.

Tatarstan möftiye Kamil Sämigullin “Biznes Online”ğa birgän äñgämäsendä xosusıy bulsa da, zur mäktäp tözergä teläwen söylägän. Ul 1200 yäisä 500-800 uquçını sıydırışlı itep salınırğa mömkin digän. Uquçılar sanı turında proyekt äzer bulğaç qına äytep bulaçaq. Tağın ber zur yañalığı – mäktäp tatar telendä belem biräçäk.

“Miss Awrupa”da qatnaşuçı Roza Gadiyeva: “Söyembikä kostyumınnan çığış yasıy aluıma söyenäm”

Tumışı belän Aznakaydan bulğan Roza Gadiyeva fevral’dä “Miss Awrupa” Xalıqara maturlıq bäygesendä qatnaşa. Ul xanbikä Söyembikä kostyumınnan çığış yasayaçaq. Bu xaqta “Tatar-inform” mäğlümat agentlığında uzğan matbuğat oçraşuında söylädelär.

“Min mäktäp yıllarınnan maturlıq bäygelärendä qatnaşam. Xalıqara bäygegä saylap alu êtabın uzdım, ilebezne täqdim itü mömkinlege açıldı. Oyıştıruçılar milli kostyumnan çığış yasarğa röxsät itte. Xalıqara mäydanda milli kiyemne kürsätü mömkinlege buluğa min bik şat. Söyembikä kostyumınnan çığış yasıy aluıma söyenäm. “Miss Awrupa”da milli ğoref-ğadätlärgä citdi qaraş bulu mine cälep itte, bu – üz tarixın buldırğan bäyge. Kostyumğa yuğarı bäyä bireler dip ömetlänäm, çönki anda küp köç salınğan,” – dip söyläde ul.

Yummy Music Band İlham Şakirov tuğan könendä cırçı repertuarınnan torğan konśert quya

Yummy Music Band törkeme 17 fevral’ könne İlham Şakirovnıñ tuğan köne uñayınnan, cırçı repertuarınnan torğan konsert quya. Muzıkantlardan häm solistlardan torğan Yummy Music Band İlham Şakirov icatınıñ törle çorlarına qarağan cırlarnı başqaraçaq. Bu xaqta Yummy Music leyblı xäbär itä.

“Ber kiçtä säxnädä Qazannıñ un aldınğı muzıkantı häm solistları – İlgiz Şayxraziyev, Êl’vira Miftaxova häm başqalar çığış yasayaçaq. Yummy Music Band xalıq cırları (Kerfekläreñ sineñ nigä qara, Ay bılbılım) häm böyek tatar şağıyr’läreneñ häm kompozitorlarnıñ avtor cırlarınnan torğan sägät’ yarımlıq programma täqdim itäçäk. Kiçäneñ qunağı – Tatarstannıñ xalıq artistı Zäynäb Färxetdinova”, - dip xäbär itä oyıştıruçılar.

Qazanda tatar muzıkası festivale uzaçaq

7-14 fevral’ könnärendä Qazanda Salix Säydäşev isemendäge Zur konśertlar zalında N. Cihanov isemendäge tatar muzıkası festivale uzaçaq. Bu xaqta Bötendön’ya tatar kongressı matbuğat xezmäte xäbär itä.

7 fevral’ könne Räşit Kälimullin, Näcip Cihanov, Rezeda Axiyarova, Êlmir Nizamov häm başqa tanılğan kompozitorlarnıñ äsärläre yañğırayaçaq.

10 fevral’ prem’yeralar köne bulaçaq. Däwlät akademiya simfonik orkestrı tarafınnan İl’yas Kamalnıñ Qıpçaq uvertyurası, İlham Baytiräkneñ “Ay bılbılım” simfonik poêması, Êl’mira Ğalimovanıñ “Qol Şärif” operasınnan özeklär häm başqa kompozitorlarnıñ äsärläre başqarılaçaq. Solistlar - Sömbel Qıyamova, Ayrat Ğaniyev, İrken Mostafin.

14 fevral’ könne Färit Yarullinnıñ 115 yıllığı uñayınnan “Şüräle” baletınnan syuita, Şamil Şärifullinnıñ 75 yıllığı uñayınnan “Yosıf Zöläyxa” baletınnan özeklär, “Cıyın” dip atalğan orkestr öçen yazılğan konśertı tamaşaçığa citkereläçäk.

Novosibirsk şähärendä tatar aş-suları bäyräm-bäygese uzaçaq

Novosibirsk şähärendä 25 fevral’dä “Tuq tamaq” tatar aş-suları ölkä bäyräm-bäygese uzaçaq. Ul tanılğan aş-su ostası Yunıs Äxmätcanovka bağışlana. Bu xaqta Novosibirsk ölkäse tatar mädäni üzäge xäbär itä.

Programmada tatar xalıq aşları, bäyräm konśertı häm Yunıs Äxmätcanovnıñ tormış yulı turında viktorina, dip xäbär itä oyıştıruçılar.

“Tuq tamaq” tatar aş-suları – ölkädäge iñ yaratqan bäyrämnärneñ bersenä äwerelde. Konkursta qatnaşırğa häm tatar aşları äzerlärgä çaqırabız, diyelä xäbärdä.