Tatarstan xäbärläre 67/2023

Tatarstan häm tatar dönyasındağı qayber waqıyğalarğa qısqaça küzätü

Änkara mêrı Qazanda

5nçe dekabr’dä Tatarstan räise Röstäm Miňnexanov Törkiyä başqalası Änkaranıñ mêrı Mansur Yavaşnı qabul itte.

 Respublika citäkçeseneň matbuğat xezmäte xäbär itkänçä, Qazan Kremlendä uzğan äňgämä barışında yaqlar bulğan mönäsäbätlärne üsterü häm nığıtu, törle yünäleşlärdä êşlekle êlemtälärne arttıru turında fiker alıştı.

Röstäm Miňnexanov Änkara xakimiyätenä Tatarstannıň üseşenä iğ’tibarlı buluı öçen räxmät belderde. Respublika Rusiya –Törkiyä mönäsäbätlären nığıtuğa üz öleşen kertä dip assızıqladı ul.

“Bez tuğandaş xalıqlar arasındağı yaxşı mönäsäbätlärne yuğarı bäyälibez. Törkiyä häm Rusiya däwlätläre arasında da, töbäkara däräcädä dä tovar äyläneşe arta. Uzğan yıl yomğaqları buyınça Törkiyä belän Tatarstan arasında tovar äyläneşe ike tapqırğa arttı, bıyıl da uňay dinamikağa iyä”,-dide Röstäm Miňnexanov.

“Yäş’lärne cälep itärgä kiräk”

Uzğan atnada Tatarstan räise Röstäm Miñnexanov İslam xezmättäşlege oyışmasınıñ Yäş’lär forumı citäkçese Taxa Ayxannı da qabul itte. Söyläşüdä kläse yıl respublikada uzaçaq BRİKS häm BRİKS+ illäre liderları sammitı çaralarına, şulay uq QazanForum xalıqara iq’tisadi forumına yäş’lärne cälep itärgä kiräklege xaqında süz buldı.  

Tatarstan citäkçeseneñ matbuğat xezmäte xäbär itkänçä, oçraşuda yäş’lär säyäsäte ölkäsendä häm yaña proyektlarda êlemtälärne üsterü turında fiker alıştılar. “İslam xezmättäşlege oyışmasınıñ yäş’lär forumı qısalarındağı êş bik möhim”,-dide Röstäm Miñnexanov. BRİKS illäreneñ Sport uyınnarı Tatarstan başqalasında 2024nçe yılnıñ 12nçe iyünennän 23enä qadär uzaçaq. Közen isä Qazanda BRİKS illäre sammitın ütkärü planlaştırıla.  

Tatar mäqame belän azan däresläre

“Tatar azanı mäktäbe”neñ çirattağı proyektı Qazannıñ “İslam dinen qabul itügä 1000 yıl” isemendäge mädräsäsendä tormışqa aşırıla. “Tatar-inform” mäğ’lümat agentlığı yazğança, biredä tatar mäqame belän azan äytü däresläre ütkärelä. Ul mädräsäneñ köndezge uqu bülege şäkertläre öçen oflayn häm distaśion formatta oyıştırıla. Çaranıñ maqsatı - bulaçaq imamnarnı sıyfatlı räweştä azan äytergä öyrätü, milli mäqamle azan tradiśiyälären torğızu, tawış künekmäläre buldıru. Kurs axırında azan bäygese ütkäreläçäk.

Tatar ğalimnäre Törkiyädä

11nçe dekabr’dä Törkiyä başqalası Änkarada 10nçı xalıqara “Törki xalıqlar mädäniyäte” kiñäşmäse başlandı. Anda Tatarstannan ike ğalimä qatnaşa. Fännär doktorı, fol’klorçı İlsöyär Zakirova kiñäşmädägelärne tatar xalqınıñ êtnik mädäniyatı qısalarında tuy yolaları belän tanıştıra. Ul älege ğoref-ğadätlärneñ Seber tatarlarında niçek uzuın añlata. Fännär kandidatı, telçe Färidä Tahirova isä üz çığışında tatarlarnıñ çabatası turında söyli.

Tatarstanda rekord däräcädä suıq

Tatarstanda dekabr’ ayı köçle salqınnar belän başlanıp kitte. Uzğan atnada Ägercedä termometr bağanaları -51 gradusqa qadär töşkän. Respublikada terkälgän iñ suıq noqta şul bula. Rayon başlığı Lenar Nurgayanov ğadättän tış köçle salqınnar säbäple xalıqqa möräcäğat’ itä. Ul iminlek qağıydälären ütärgä, ayıruça, balalar häm ölkännärgä iğ’tibarlı bulırğa, yıraq yullarğa çıqmasqa çaqıra. Cirlektä kommunal’ häm başqa cawaplı xezmätlär köçäytelgän êş rejimına küçkän. Respublika külämendä isä anomal’ salqınnar arqasında ştorm kisätüe iğ’lan itelde. Tatarstan räise Röstäm Miñnexanov xalıqnı cılı kiyenergä çaqırdı häm toraq-kommunal’ xucalığı ob’yektlarınıñ êşen nıqlı kontrol’dä totarğa kürsätmä birde.