Tatarstan xäbärläre 61/2023
Tatarstan häm tatar dön’yasındağı qayber waqıyğalarğa qısqaça küzätü
Törkiyäneñ Qazandağı General’ konsulı watandaşların Cömhüriyät köne belän qotladı
Törkiyäneñ Qazandağı General’ konsulı Uğur Yılmaz Cömhüriyät könendä Rusiyädä yäşäwçe watandaşlarına möräcäğat’ itte.
“Bez Törkiyä Cömhüriyäteneñ 100 yıllığın ğorurlıq belän bäyräm itäbez. Rusiya Federaśiyäsendä yäşäwçe watandaşlarımnı, Törkiyä cämäğat’çelegen, Rusiya Federaśiyäseneñ dus xalqın häm tuğandaş Tatarstan Respublikasın çın küñeldän qotlıym, iñ izge teläkläremne citkeräm”,- dide Uğur Yılmaz.
”Bez Ğazıy Mostafa Kämal Atatörekne, anıñ köräştäşlären, Azatlıq suğışı geroyların, cirlärebezne Watanıbızğa äyländergän köräştä hälaq bulğan suğışçılarnı häm veterannarnı märxämät häm räxmät xisläre belän iskä alabız”,- dide Törkiyäneñ Qazandağı General’ konsulı.
Rusiya däwlät başlığı Räcäp Tayyip Ärdoğannı Törkiyä Cömhüriyäteneñ 100 yıllığı belän qotladı
Uzğan yöz yıl êçendä Törkiyä küp sınawlarnı ciñde häm küp ölkälärdä tanılu alıp, uñışlarğa ireşte.
Bu xaqta Rusiya Federaśiyäse däwlät başlığı Vladimir Putin Törkiyä ilbaşın qotlağanda belderde.
Qotlaw telegrammasında Putin Ärdoğannı “qaderle dus“ dip atadı häm anıñ ike däwlät duslığın häm yaxşı kürşelegen üsterügä, urtaq proyeklarnı ğamälgä aşıruğa kertkän öleşen bilgeläp ütte.
”Törle yünäleşlärdäge xezmättäşlek yaxşı näticä birä, zur urtaq proyektlar planlı räweştä tormışqa aşırıla. Mäskäw häm Änkara kön tärtibendäge regional’ häm global’ möhim mäs’älälärne xäl itüdä tırışlıqların uñışlı koordinaśiyäli “,- dide däwlät başlığı Putin.
Vladimir Putin şulay uq Rusiya -Törkiyä êlemtälären tağın da nığıtuğa, ğadelräk häm demokratik dön’ya tärtiben tözü buyınça urtaq êşkä ömet belderde.
Röstäm Miñnexanov Räcäp Tayyip Ärdoğannı Törkiyäneñ 100 yıllığı belän qotladı
Tatarstan Räise Röstäm Miñnexanov Törkiyä ilbaşı Räcäp Tayyip Ärdoğannı häm Törkiyä xalqın Cömhüriyät oyışunıñ 100 yıllığı belän qotladı.
Tatarstan Respublikası citäkçese Tatarstannıñ Rusiya -Törkiyä mönäsäbätlärendä bäyläwçe zveno bulıp toruın iskärtte. Tatarstan häm Törkiyä xalıqları tradiśiyäläre häm mädäniyäte buyınça yaqın. “Tuğandaş xalqıbız tormışı çäçäk atuın telim! Törkiyä xalqına sälamätlek telim”,- dip qotlıy ul öç teldä.
Törkiyäneñ 100 yıllığına bağışlanğan çarada tatarlar turında söylädelär
Törkiyä universitetlarında êşläwçe tatar ğalimnäre Çulpan Zarif-Çätin häm Ramilä Yarullina -Yıldırım Törkiyä Cömhüriyäte qorıluına 100 yıl tulu uñayınnan “Xäydär Äliyev häm Törkiyä “ xalıqara fänni simpoziumında qatnaşıp, tatar ädäbiyatı häm tatar şäxesläre turında söylädelär.
Törkiyäneñ Kars şähärendäge Qavqaz universitetında êşläwçe Çulpan Zarif - Çätin “Fözulineñ 19 nçı ğasır tatar poêziyäsenä yoğıntısı” dip atalğan çığışında Äbelmänix Qarğalıy, Hibätulla Salixov, Şämsetdin Zäki, Utız İmäni äsärlären analizlap, älege şağıyr’lärneñ icatına Azärbaycan şağıyre Möxämmäd Fözulineñ yoğıntısı turında söyläde.
Malatiya şähärendä İnönü isemendäge universitet ğalimäse Ramilä Yarullina -Yıldırım “Mädäni kütäreleş öçen köräşkän Maksudilär” dip atalğan dokladın täq’dim itte. Ul çığışında bertuğan Hadi häm Sadri Maksudilärneñ tatar mäğarifen, mädäniyäten üsterü yünäleşendäge xezmätläre belän tanıştırdı. Alarnıñ İsmäğıyl’ Ğaspralı fikerlärennän ilham alıp, törki dön’yanıñ alğarışın qayğırtuçı cäditçe şäxeslär arasında iñ aldınğılar buluın assızıqladı dip xäbär itä ”Tatar-İnform“ mӓğ’lümat agentlığınıñ Törkiyӓdӓge xӓbӓrçese jurnalist Ruşaniya Altay.
”Xäydär Äliyev häm Törkiyä” xalıqara fänni simpoziumı Qavqaz universitetında, Törkiyä Cömhüriyäte qorıluğa 100 yıl tuluğa bağışlap, Azärbaycannıñ “Êlger” fän häm mäğarif üzägeneñ iniśiativası belän Törkiyä Fän häm mäğarif ministrlığı, Qavqaz universitetınıñ xäzerge çor törki tellär häm ädäbiyatları bülege, Azärbaycannıñ Törkiyädäge ilçelege häm Karstağı General’ konsullığı, Törek-Azärbaycan oyışmaları federaśiyäse, İskeşähär - Azärbaycan assośiaśiyäse häm başqalar yärdäme belän oyıştırılğan.
Şunısı da iğ’tibarğa layıq: tatar ğalimäläre Çulpan Zarif - Çätin häm Ramilä Yarullina -Yıldırım älege simpoziumnı oyıştıru komitetı äğ’zaları.
Tatarstanda kiläse yılğa xacğa yullama bäyäläre bilgele
Tatarstannıñ “DUM RT Xac” räsmi xac operatorı 2024 nçe yılda xac qılu öçen ğarizalar qabul itä. 10 nçı noyabr’gä qadär genä yullamanı maxsus bäyägä alıp bula, här programmağa 10 urın bülep birelä.
İzge cirlärgä turlar Qazannan häm Mäskäwdän tübändäge programmalar buyınça oyıştırıla:
”Êkonom kombi” – 4500 dollardan başlana (maxsus bäyä buyınça 4300 dollardan)
”Êkonom avia” – 5000 dollardan başlana (maxsus bäyä buyınça 4900 dollardan )
”Standart” – 5800 dollardan başlana (maxsus bäyä buyınça 5500 dollardan)
“VİP”- 11 meñ 600 dollar (akśiya buyınça 10 meñ 990 dollar). Bu bäyägä 4 urınlı qunaqxanä nomerı kertelgän.
Tatarstanda xac qılu öçen 4 programma êşlände. Alarnıñ bäyäläre – 4500 dollardan alıp 11600 dollarğa qadär.
Bäyälär qunaqxanäneñ däräcäse häm “Äl-Xäräm” mäçetenä yıraqlığına, säfärneñ ozınlığına, marşrutnıñ törenä (oçqıç belän yäki oçqıç+avtobus), tuqlanuğa, yullamağa qorbannıñ häm başqa xezmätlärneñ kertelüenä qarap bilgelänä.
Tatarstanda 1,1 milliard ağaç üsä, har keşegä 280 ağaç turı kilä
Tatarstan Urman xucalığı ministrlığı xäbär itkänçä, Tatarstan Respublikasında ber keşegä 280nän artıq ağaç turı kilä. Tatarstan Rusiyäneñ az urmanlı töbäkläre isäbendä. Respublika territoriyäseneñ nibarı 17,7%ı ğına urman belän qaplanğan. Şul uq waqıtta monda urmannar turında qayğırtu sıyfatı yaxşı kürsätkeç : urman kişärlekläreneñ 70% tiräse - urman xucalığı taläplären tulısınça qanäğat’länderä. Töbäktä urmannı torğızu häm urman üsterü buyınça aktiv êş alıp barıla.
Töbäkneñ 80%ı mäydanın yafraqlı ağaçlar biläp tora. Tatarstan urmannarında yışraq yükä, qayın, usaq, öräñge häm narat üsä. Töbäktä barlığı 1 milliard 100 million ağaç bar. Şulay itep, respublikada yäşäwçe här keşegä 280 nän artıq ağaç turı kilä. Urman ağaçlarınıñ 97%ı urman fondı cirlärendä urnaşqan.
Yazmada Tatarstan Räiseneñ matbuğat xezmäte, “Tatar-inform” xäbär agentlığı yazmaları qullanıldı.
