Tatarstan xäbärläre-36/2023
Uzğan atnada Tatarstanda bulıp uzğan qayber waqıyğalarğa küzätü
Tatarstan Räise: “Bezneñ respublika yuğarı turistik potenśialğa iyä”
Tatarstan Räise Röstäm Miñnexanov Abu-Dabida yıl sayın ütkärelä torğan “AIM Global 2023” 12nçe investiśion forumınıñ xörmätle qunağı buldı. Ul “Dön’ya liderları debatları” plenar utırışında qatnaşuçılar aldında xalıqara êkspert bularaq çığış yasadı. Respublika citäkçese Tatarstannıñ investiśion potenśialın täq’dim itte häm qunaqlarnı “Rusiyä-İslam dönyası: KazanForum” xalıqara iq’tisadi forumına çaqırdı.
Forumnıñ plenar utırışı “İnvestiśion paradigmanıñ almaşınuı: totrıqlı iq’tisadi üseşkä, törlelekkä häm çäçäk atuğa yärdäm itü öçen bulaçaq investiśion mömkinleklär” temasına bağışlanğan ide. Röstäm Miñnexanov bilgeläp ütkänçä, bu mäs’älä xäzerge geosäyäsi şartlarda ayıruça ähämiyätkä iyä.
Forum kiñleklärendä Tatarstan Cömhüriyäte Räise Röstäm Miñnexanov Berläşkän Ğaräp Ämirlekläreneñ Tışqı säwdä Däwlät ministrı Tani Äxmät Äl-Zäyüdi belän küreşep söyläşte.
Monnan tış Tatarstan Räise Berläşkän Ğaräp Ämirleklärendä “Al Rais” turoperatorı wäkilläre belän dä oçraştı.
“Bezneñ respublika yuğarı turistik-rekreaśion potenśialğa iyä, anıñ cirlegendä milli, mädäni häm tarixi miras ob’yektları tuplanğan. Bezdä zur iq’tisadi, sport häm mädäni waqıyğalar uza. Bez turizm industriyäsen häm qunaqçıllıqnı respublikabız iq’tisadı üseşeneñ möhim yünäleşe bularaq küräbez. Tatarstannıñ tarixi urınnarı törle yäş’täge, törle millät häm din wäkillärendä qızıqsınu uyata,” – dide Röstäm Miñnexanov.
Mars Tuqay: “Bu – tatar xalqı öçen bik zur yuğaltu”
Rusiyä Federaśiyäseneñ Qurğan ölkäseneñ Êçken (Yoldız) tatar awılında yanğın faciğase barlıqqa kilgän.
Bötendönya tatar kongressı Başqarma komitetı citäkçeseneñ berençe urınbasarı Mars Tuqay fikerençä, Êçken (Yoldız) awılındağı yañğın – tatar xalqı öçen zur yuğaltu.
“Êçken – borınğı tatar awılı, anı Qurğan töbägeneñ tatar başqalası dip tä atıylar. Ul iñ zur tatar awıllarınıñ berse, tarixi awıl, anda zamanında meñgä yaqın keşe yäşägän. Ul söyläm yağınnan da üzençälekle, anda êçken tatarları yäşi. Zamanında Seber xanlığı awıllarınnan, anda qazanlılar da küçep utırğan. Tarixi, milli üzäk. Bu – tatar xalqı öçen bik zur yuğaltu”, - dide Mars Tuqay.
“Şäxesneñ kiläçäkkä baruın-barmawın yäş’lär bilgeli”
Tatarstan başqalası Qazanda tatar cämäğät’çelege berençe tatar professional’ teatr truppasına nigez saluçılarnıñ berse bulğan Ğabdulla Kariyıvne 137 yıllığı uñayınnan iskä aldı.
Tatar cämäğätçelege Yaña Tatar ziratına barıp, anıñ kaberenä çäçäklär saldı. İskä alu çarasında Ğabdulla Kariyıv isemendäge Tatar däwlät yäş’ tamaşaçı teatrı kollektivı, Ğaliäsğar Qamal, Kärim Tinçurin isemendäge teatr artistları, yazuçılar, cämäğat’ êşlekleläre qatnaştı.
İskä alu çarasın Bötendönya tatar kongressınıñ Qazan bülege citäkçese Färit Miftaxov alıp bardı. “Bulğan mirasnı yäş’ buınğa tapşırırğa, kiläçäktä dä teatrnıñ däräcäsen üsterü öçen êşlärgä tiyışbez”, - dide ul.
Qazan däwlät mädäniyät häm sänğät institutı rektorı Roza Äxmädiyıva Ğabdulla Kariyıv êşçänlegeneñ zur qıymmätkä iyä buluın äytte. “Ğabdulla Kariyıv – ul tatar teatrı, professional’ rejissurağa nigez sala. Ul obrazlarnı psixologik yaqtan tirän qarıy, härwaqıt uqıy. Anı härwaqıt iskä alsaq, yäş’lärebezgä citkersäk, tatar tele, milläte, teatrı mäñge yäşär,” – dide ul.
Kariyıv isemendäge yäş’ tamaşaçı teatrı direktorı Luiza Yansuar tatar teatrına nigez saluçı şäxesne xörmätläp iskä aluçı yäş’lär buluına söyınüen belderde. “Şäxeslär olı bağana bulıp, icatları belän xalıq küñelendä qala ikän, alar ülemsez bula. Şäxesneñ kiläçäkkä baruın-barmawın yäş’lär bilgeli. Bezneñ yäş’lär teatrında bu tradiśiyälärneñ saqlanuına min bik räxmätle. Olı buınnıñ da, yäş’lärneñ dä bu isemne, şäxesne qaderläp saqlawına räxmät,” – dip äytte Luiza Yansuar.
Bügenge yazmabızda Tatarstan Räiseneñ matbuğat xezmäte belän “Tatar-inform” xäbär agentlığı yazmaları qullanıldı.
