Yasalma intellekt hönärlärgä yanıymı?

“Tormışnıñ qızıqlı yaqları” tapşıru tezmäbezneñ bügenge çığarılışında hönärlärneñ yasalma intellekt qurqınıçı astında bulıp bulmawı turında süz alıp barabız.

Bügenge köndä keşe köçenä moxtac bulğan bik küp êş kiläçäktä yasalma intellekt häm maşinalar belän başqarılaçaq dip däğ’wa itälär. Läkin bezneñ urınıbıznı alar ala almıy dip uylawçılar da bar. Şulay da qaysı hönärlär qurqınıç astında soñ?

Avtomatizaśiya häm yasalma intellekt ölkäsendäge alğarışlar keşelärne moña qadär kürmägän iminlek, mullıq  däräcäsenä kiterü mömkinlegenä iyä.

Şulay uq iq’tisadlarnı bozu, berniçä buın tormışıbıznı cimerü häm Stiven Xoking yäki Êlon Mask kebek şäxeslär fikerençä keşelekne yuq itü mömkinlege dä bar.

İñ zur qurqınıçlarnıñ berse – hönärlärneñ kiläçäge.

85 million êş urını qısqartılırğa mömkin

Bötendön’ya iqtisadıy forumı küptän tügel bu temağa xisap äzerläde.

Yasalma intellekt häm robototexnika ölkäsendäge tiz üseş belän êşlängän maşinalar êş urınnarınıñ zur öleşen alıştırırğa mömkin digän näticä yasaldı.

Bu temağa 26 ilneñ 15 tarmağında tikşerenülär ütkärelde. 2025 nçe yılda keşelär häm maşinalar arasında yaña êş urtaqlaşu arqsında urta häm êre êşxanälärdä 85 million êş urını qısqartılaçaq dip farazlıylar.

Tikşerenülär kürsätkänçä, tarmaqlardağı här 100 êştän 52 sen maşinalar, 48en keşelär başqaraçaq.

Ütkännärdä bulğanı kebek qayber yaña êş urınnarı buldırılsa da, aqıllı maşinalarnıñ çığımı waqıt uzu belän kimi häm mömkinlekläre artqanğa, alar citärlek bulmayaçaq.

Xalıqara robototexnika federasiyäse (IFR), sänäğat’ robotlarınıñ üseşe yıl sayın urtaça 14%qa tizlänäçäk dip sanıy.

Härber êşkä ber ük däräcädä qurqınıç yanamıy

Kliyentlarğa xezmät kürsätüçelär, buxgalterlar, qabul itüçelär , waqlap satu xezmätkärläre êşlären yuğaltu qurqınıçı astında torğan törkemnär.

Uqıtuçılar, idaräçelär, säyäsätçelär, din ähelläre, psixologlar häm psixiatrlar, xirurglar, sänğät’çelär häm yazuçılar bik az qurqınıç yanawçı hönäri törkemnärdä.

Bu qaraşnı xuplawçılar sanı bik küp, läkin kiresen uylawçılar da bar.

Mäğ’lümati fännär şirkäte SAS beldergänçä, komp’yuterlar bezneñ urınıbıznı ala almağan kebek, yasalma intellekt häm robotlar da bezne almaştıra almayaçaq.

Çığanaq: TRT Xäbär