Rämis Aymät: “Äy, Türkiyäm, işetämseñ tawışım?”
Tatarstan xäbärläre 28/2023
Tatarstan xäbärläre 28/2023
Türkiyädäge cirteträwlär afäte Tatarstanda yäşäwçe millättäşlärebezne dä borçuğa saldı. Tatar milläte dä törek törek xalqınıñ qayğısın urtaqlaştı, teläktäşlek belderde.
Tatarstan yazuçılar berlege äğ’zase, Musa Cälil premiyası laureatı, Tatarstannıñ atqazanğan sänğät êşleklese, şağıyr Rämis Qıyam ulı Aymät, Türkiyäneñ qayğısın urtaqlaşıp, üz uy-kiçereşlären şiğri yulları belän citkerde:
TÜRKİYÄ. ĞASIR FÄLAKÄTE
Äy, Türkiyäm, işetämseñ tawışım?
Min äle bu, tatar qardäşeñ.
Bügen tañda, meñ çaqrımnar aşa,
Yörägemä tamdı küz yäşeñ.
Öyırelep kilgän xäsrät utıñ
Bäğıremne aldı köyrätep.
Bu canımnı qayğılarsız ğına
Yäşärgä şul bulmıy öyrätep
Yöräk param minem, küz almam sin,
Hiç tä tözälmäslek can yaram.
Afätlärdän, zinhar, yolıp al, dip,
Kükläremnän sorap yalwaram.
Äy, Türkiyäm, Ana Watanım sin,
Tamırlarda urtaq qan ağa.
Tetkälängän xaräbälär güya,
İşeldelär minem canğa da.
İşeldelär üksez ütkännärem,
Ni üle min xäzer, ni tere.
Çigälärdä yanartawday teträp,
Uyandı kük tarix xätere.
Yörägemne parä-parä telde
Sigez ballı xislär teträwe.
Teträsä dä xislär, awmadı, yuq,
Ömetemneñ qorıç teräwe.
ТӨРКИЯ. ГАСЫР ФӘЛАКӘТЕ
Әй, Төркиям, ишетәмсең тавышым?
Мин әле бу, татар кардәшең.
Бүген таңда, мең чакрымнар аша,
Йөрәгемә тамды күз яшең.
Өерелеп килгән хәсрәт утың
Бәгыремне алды көйрәтеп.
Бу җанымны кайгыларсыз гына
Яшәргә шул булмый өйрәтеп.
Йөрәк парәм минем, күз алмам син,
Һич тә төзәлмәслек җан ярам.
Афәтләрдән, зинһар, йолып ал, дип,
Күкләремнән сорап ялварам.
Әй, Төркиям, Ана Ватаным син,
Тамырларда уртак кан ага.
Теткәләнгән харәбәләр гүя,
Ишелделәр минем җанга да.
Ишелделәр үксез үткәннәрем,
Ни үле мин хәзер, ни тере.
Чигәләрдә янартаудай тетрәп,
Уянды күк тарих хәтере.
Йөрәгемне парә-парә телде
Сигез баллы хисләр тетрәве.
Тетрәсә дә хисләр, аумады, юк,
Өметемнең корыч терәве.
– Коткарыгы-ы-ыз! Ярдә-ә-әм!!
Колагымда
Бер үк аваз һаман, бер үк өн
Үзәгемне өзә, телә җанны,
Тынгы бирми инде ничә көн.
Таң пәрдәсен ертып, ул кайтаваз
Бөтен вөҗүдемне ялмады.
Кичерә күр, төрек аркадашым*,
Ярдәм кулым суза алмадым.
– Коткарыгы-ы-ыз!!!
Гүя вөҗдан үзе
Дәшә сыман безне ярдәмгә.
Җыйган малың түгел, бер сынык нан**
Кадерлерәк кайчак адәмгә.
Өзелергә торган гомер җебен
Бер тамчы су ялгый икән лә.
Бер сулыш та өмет бирә кайчак
Сулып барган гомер-җилкәнгә...
Гасыр фәлакәте... Яусыз яуны
Туктата алыр икән кем аны?!
Кешелекнең кылган гөнаһларын
Күтәрә алмый, ахры, җир җаны.
Ярыла ул, тетри, диңгезләрне
Әйләндереп каплый, Йа, Раббым!
Әй син, кешем, иман китермәсәң,
Кыямәткә тагын бер адым.
...Кайдан килеп таш йортларның нигезе
Нык булсын ди?! – Чорның чын йөзе! –
Какшый барган чакта бер-бер артлы
Дәүләтләрнең терәк-нигезе.
Череп барган чакта...
Намус, вөҗдан
Кереп барган чакта гүрләргә,
Имансызлык, ришвәтчелек азып,
Хуҗа булган чакта түрләргә...
Җирләр генә түгел, хәтта Күкләр
Ярылыр күк, тотып йөрәген.
Югалтса ул беркөн, таулар түгел,
КЕШЕ дигән ныклы терәген.
_______
*Аркадаш – дус, иптәш.
**Нан – икмәк.
25 февраль, 2023
Рәмис АЙМӘТ
Tanılğan tatar şağıyre Rämis Aymätneñ Türkiyädäge “Qardäş qalamnär” jurnalında Ruşaniya Altay häm Alp Ärän Dämirqayanıñ törekçägä tärcemäse belän çıqqan şiğıren avtor başqaruında TAWIŞ UYNATQIÇINNAN tıñlıy alasız.
