Türkiyädäge cir teträwlär häm törki dön’yanıñ Türkiyägä yärdämnäre

6 nçı fevral’dä Türkiyädä 7,6 häm 7,8 ball zurlıqlarında ike köçle cir teträw buldı. Hälakätneñ êpiśentrı – ilneñ kön’yağındağı Kahramanmaraş töbäge ide. “Ğasır faciğası” dip atalğan cir teträwdän Türkiyäneñ 10 provinśiyäse zıyan kürde. Köçle tirbäleşlär Süriyä, Kipr, Gruziya, Abxaziya, Ärmänstan, Ğıyraq häm Livanda da sizelde. Cir teträwdän 30 meñnän artıq keşe hälaq buldı, 100 meñ tiräse keşe yaralandı. 

Törki dön’ya häm törki cömhüriyätlär cir teträw bulğannan birle Türkiyä öçen mobilizaśiyäländelär.

Tön’yaq Kipr Törek Cömhüriyäte Türkiyä belän bergä cide könlek matäm iğ’lan itte. Törki cömhüriyätlärneñ xalıqara oyışmaları bulğan Törki däwlätlär oyışması, TÜRKSOY, TürkPA, Xalıqara törki miras waqıfı, Xalıqara törki akademiyanıñ bayraqları yartılaş töşerelde.

Törki cömhüriyätlärneñ ilbaşları berençe mizgeldän ilbaşı Räcäp Tayyip Ärdoğan belän êlemtägä kerdelär. Alar Türkiyägä berençe êtapta kiräk bulğan äyberlär xaqında kiñäşläştelär. Törki cömhüriyätlärneñ ilbaşları aldağı könnärdä Türkiyäneñ tulı wäqalätle ilçeleklärenä barıp Türkiyä xalqınıñ qayğısın urtaqlaştılar. 11 nçe fevral’dä Azärbaycan tışqı êşlär ministrı Cäyhun Bäyrämov cir teträw töbägendä buldı.

Törki cömhüriyätlär ilbaşlarınıñ quşuı buyınça Türkiyägä êzläw-qotqaru törkemnäre, tabiblar häm berençe yärdäm materialları cibärä başladılar.

Ber atna êçendä Türkiyägä Azärbaycan 725, Üzbäkstan 171, Qazaqstan 101, Qırğızstan 146, Vengriya 156, Tön’yaq Kipr Törek Cömhüriyäte 200, Başqortstan 25 häm Törekmänstan 10 keşedän torğan êzläw-qotqaru törkemnäre cibärdelär. Şulay itep çit illärdän iñ küp qotqaruçı törki cömhüriyätlärdän kilde. Törki cömhüriyätlärdän kilgän qotqaruçılar xäzergä çaqlı 100 dän artıq keşene cimereklärdän isän kileş çığardılar.

Bu törkemnärdä tabiblar häm mediśina xezmätkärläre dä bar. Azärbaycan, Üzbäkstan, Qazaqstan häm Qırğızstan cir teträw töbägendä qır xastaxanäläre buldıra başladılar. Azärbaycan räsmi zatları cir teträwlärdän zıyan kürgän ike meñ keşene Azärbaycanda däwalawğa äzer buluların belderdelär.

Törki dönya Türkiyä öçen yärdäm kampaniyäse dä başlatıp cibärde. Saxa Cömhüriyätennän Awrupanıñ êçke öleşenä qadär ictimaği oyışmalar, cirle citäkçeleklär, törki cömhüriyätlär xökümätläre cıyılğan yärdämnärne üz mömkinlekläre häm Türkiyä wäqalätleläre aşa Türkiyägä citkerä başladılar. Xäzergä çaqlı älege cirlärdän  distälägän oçqıç häm yözlägän yök maşinaları Türkiyägä kilde.

Türkiyädä yäşäwçe törki dön’ya wäkilläre dä berläşep cir teträw töbägenä kittelär. Alarnıñ qayberläre êzläw - qotqaru törkemendä êşläsä, qalğan öleşe watandaşlarğa azıq-tölek häm berençe yärdäm kiräk-yaraqları öläşä.

Soñğı waqıyğalar kürsätkänçä, törki dön’ya mondıy waqıyğalar aldında ütkännär belän çağıştırğanda tağın da köçleräk, añlıraq, oyışqan häm aktiv poziśiyädä. Türkiyä köçle däwlät, bu cir teträw yaralarınıñ qısqa waqıt êçendä tözälüe öçen zur köç quyaçaq. Bu barışta törki dön’yanıñ matdi häm ruxi yärdäme Anadoluğa köç biräçäk.