Kön’yaq Qavqazdağı waqıyğalar

Uzğan atnada Kön’yaq Qavqazda berniçä möhim säfär tormışqa aştı. Bu säfärlärgä küz salıyq.

Misır däwlät başlığı Abdülfettah äs-Sisi 27-29 ğıynwar könnärendä Kön’yaq Qavqazğa säfär yasadı. Misır ilbaşınıñ berençe tuqtalışı Baqı buldı. 28 ğıynwarda Azärbaycan prezidentı İlham Äliyıv häm däwlät başlığı äs-Sisi arasında uzğan söyläşüdä Azärbaycan-Misır mönäsäbätläre, regional’ mäs’älälär qaraldı.

28 ğıynwar könne Misır liderı Ärmänstanğa säfär oyıştırdı. Yerevanda däwlät başlığı Sisi Ärmänstan prezidentı Vaagn Xaçaturyan häm prem’yer-ministrı Nikol Paşinyan belän söyläşü ütkärde. Söyläşülärdän soñ mäğarif, fän, sport kebek ölkälärdä xezmättäşlek kileşüläre imzalandı. Şulay itep ber Misır ilbaşı berençe tapqır Ärmänstanğa säfär yasadı.

29-30 ğıynwar könnärendä Azärbaycan prezidentı İlham Äliyıv Vengriyağa räsmi säfär belän bardı. 30 ğıynwarda Budapeştta Aliyevnı räsmi qarşı alu tantanası oyıştırıldı. Tantanadan soñ ike il däwlät başlıqları İlham Äliyıv häm Katalin Novak üzara küreşep söyläşte. Şul uq könne İlham Aliyev Vengriya prem’yer-ministrı Viktor Orban belän dä küreşte. Söyläşüdä ênergiya belän ber rättän kön tärtibendäge mäs’älälär quzğatıldı. Söyläşülärdän soñ taraflar arasında 6 kileşü häm strategik xezmättäşlekne tiränäytügä qarağan urtaq belderge imzalandı. Liderlar arasında Azärbaycan êlektr ênergiyaseneñ Qara diñgez aşa Awrupa illärenä ireşterelüe, Azärbaycan tabiğıy gazınıñ Vengriyağa häm Vengriya aşa qalğan Awrupa illärenä küçerelüe mäs’älälärendä kileşü täêmin itelde. Aliyev häm Orban matbuğat oçraşuı oyıştırdı. İlham Äliyıv kiläse atnadan başlap Qarabaxnıñ tözekländerelüe mäs’äläsendä Vengriya şirkätläre belän tögäl proyektlarnı qarayaçqların citkerde.

2 fevral’ könne Rumıniya däwlät başlığı Klaus Yoxannis Azärbaycanğa räsmi säfär yasadı. Aliyev belän Yoxannis arasında uzğan söyläşüdä ênergiya belän ber rättän ike yaqlı mönäsäbätlärne qızıqsındıruçı mäs’älälär qaraldı.

3 fevral’dä Baqıda Azärbaycan häm Rumıniya liderları qatnaşında 9nçı Kön’yaq Tabiğıy gaz koridorı Ministrlar Kiñäşmä cıyılışı oyıştırıldı. Cıyılışta Awrupa Berlege, Amerika Quşma Ştatları, Angliya, İtaliya, Türkiyä, Gruziya, Vengriya, Bolgariya, Greŝiya, Albaniya, Moldova, Serbiya, Çernogoriya, Ukraina häm Xorvatiyadan ministrlar qatnaştı.

Uzğan atnada Kön’yaq Qavqaz illäreneñ Türkiyä belän mönäsäbätläre mäs’äläsendä möhim säfärlär çınğa aşırıldı. Türkiyäneñ Milli mäğarif ministrı Maxmut Özer häm Türkiyä Böyek Millät Mäclese xalıq ışanıçlılarınnan toruçı wäkillek 1 fevral’ könne Azärbaycan ilbaşı İlham Aliyev tarafınnan onlayn räweştä qabul itelde. Söyläşüdä ike yaqlı mönäsäbätlär, açıluı planlanğan Azärbaycan-Türkiyä Universitetı mäs’äläläre quzğatıldı.

1 fevral’ könne Azärbaycan Saqlanu ministrı Zakir Gasanov Türkiyägä säfär yasadı. Türkiyäneñ saqlanu ministrı Hulusi Akarnıñ çaqıruı belän Türkiyägä kilgän Gasanov “Qış xärbi künegüläre-2023” xalıqara xärbi künegülären qarayaçaq.

Täraqqıyät’lärdän kürengänçä uzğan atnada Kön’yaq Kavkaz illäre kön tärtibendä möhim säfärlär bar ide. Azärbaycan Awrupa Berlege illäre belän mönäsäbätlären nığıta.

Avtor - Abdrasul İsakov