Törki cömhüriyätlärdä tormışğa aşqan möhim säfärlär

Uzğan atnada Azärbaycan häm Qazaqstan däwlät başlıqları Berläşkän Ğaräp Ämirleklärenä säfär yasadı häm “Abu-Dabida totrıqlı üseş atnası 2023” oçraşuında qatnaştılar. 15 ğıynwar könne Azärbaycan ilbaşı İlham Aliyev Berläşkän Ğaräp Ämirleklärenä êş säfäre belän bardı. Aliyev Abu-Dabida prezident Şeyh Möxämmäd bin Zayid al Nahyan belän küreşte. Söyläşüdä ike yaqlı mönäsäbätlärgä qarağan mäs’älälär quzğatıldı.

Qazaqstan däwlät başlığı Qasıym Cumart-Toqayev 16-18 ğıynwar könnärendä Berläşkän Ğaräp Ämirleklärenä räsmi säfär yasadı. Toqayev Berläşkän Ğaräp Ämirlekläre däwlät başlığı tarafınnan tantanalı räweştä qarşı alındı. Annarı wäkilleklärara söyläşü uzdı. Söyläşülärdän soñ taraflar arasında 9 kileşügä qul quyıldı. taraflar urtaq säwdä külämen 1 milliard dollarğa kütärüne maqsat itä. Däwlät başlığı Toqayev säfär qısalarında ğaräp ämirläre häm aldınğı ğaräp investorları belän söyläşülär ütkärde. Şulay uq Qazaqstan prezidentı Toqayev ğaräp êşmäkärläre belän tügäräk östäl cıyılışı uzdırdı.

Azärbaycan däwlät başlığı İlham Aliyev 17-19 ğıynwar könnärendä Şveyŝariyağa säfär oyıştırdı. Davos Bötendön’ya İqtisad forumında qatnaşqan Aliyev forum qısalarında Latviya häm Litva prezidentları, Xorvatiya häm Niderland prem’yer-ministrları, Berläşkän Millätlär Oyışması, Awrupa Berlege kebek xalıqara oyışmalarnıñ räsmi zatları häm xalıqara şirkät citäkçeläre belän söyläşülär ütkärde. Azärbaycannıñ ênergiya çığanaqlarınıñ Awrupağa täêmin itelüe mäs’äläse kön tärtibendäge ähamiyäten saqlıy birä.

Üzbäkstan däwlät başlığı Şäwkät Mirziyayev 17-18 ğıynwar könnärendä Singapur Cömhüriyätenä säfär yasadı. İlbaşı Mirziyayev Singapur liderı Xälimä Yakup häm prem’yer-ministr Li Hsien Loong belän söyläşü ütkärde. Söyläşülärdän soñ taraflar arasında 7 kileşü häm Üzbäkstan-Singapur İnvestiŝiya şirkäteneñ qorıluına qarağan memorandum imzalandı. Mirziyayeb säfäre qısalarında Li Kuan Yew isemendäge İctimağıy diplomatiya mäktäbenä bardı häm ilneñ aldınğı êşmäkärläre belän küreşte. İke il arasındağı säwdä küläme soñğı yılda ike tapqırğa arttı.

Uzğan atnada Törekmänstanda möhim säfärlär çınğa aşırıldı. 18 ğıynwarda Tatarstan prezidentı Röstäm Miñnexanov Aşxabadka bardı. Miñnexanov Törekmänstan Parlamentı başlığı Gurbanguli Bärdimöxämmädov belän küreşte. 19 ğıynwar könne Rusiyä prem’yerı Mixail Mişustin Törekmänstanğa êş säfäre belän kitte. Mişustin başta Aşxabadtağı Törekmän-rus mäktäbenä bardı, annarı däwlät başlığı Serdar Bärdimöxämmädov häm Xalıq êşläre başlığı Gurbanguli Bärdimöxämmädov belän küreşep söyläşte. Söyläşülärdän soñ Mixail Mişustin Törekmänstan-Rusiyä Êş forumında qatnaştı. Aşxabad şähärendä Rusiyä Säwdä yortın açtı.

Täraqqıyät’lärdän kürengänçä uzğan atnada Azäbaycan, Qazaqstan häm Üzbäkstan däwlät başlıqları möhim çit il säfärlären çınğa aşırdı. Älege säfärlärdä iqtisad töp kön tärtiben täşkil itte. Mondıy ike yaqlı säfärlär yärdämendä Törki cömhüriyätlärgä çit illärdän investiŝiyalärneñ kertelüe täêmin itelä.

Abdrasul İsakov