Balalar immunitetın nığıtabız

Balanslı tuqlanu

Balalar immunitetı turında qayğırtabız ikän başta döres tuqlanu yağın qaraw zarur.

Yoqı bik möhim

Yoqı da immunitet häm tän sälamätlege öçen bik möhim.

Su

Baliğ bulğannar kebek balalar öçen dä su êçü ähämiyätle.

Söläyman balığı

Omega 3 häm may kislotaları da immunitetnı nığıtuda möhim rol’ uynıy. Balalarnıñ baş miye üseşenä öleş kertüçe söläyman balığı şulay uq organizmnı infekŝiyalärdän saqlıy. Balıqnı miçtä yäki mangalda peşerergä bula. Garnir bularaq bäräñge yäki yäşelçä bara.

Kivi

C vitaminına bay bulğan kivida organizmnı saqlawda wazifa başqaruçı antioksidantlar bar.

Timer citmäw probleması küzätelgän balalarğa kivinı päkmäz belän bergä aşatırğa kiräk. Çönki päkmäzdäge timerneñ üzläşterelüe öçen C vitaminı zarur.

Yogurt

Balalarğa könenä ber käsä yogurt aşatığız. Yogurtnı berüzen yäisä qalğan aşlar belän quyarğa bula. Yogurtta êçäkleklär öçen faydalı mikroorganizmnar bar. Êçäk florasın tärtipkä saluçı bu bakteriyalar organizmnı toksinnar häm patogennarğa qarşı saqlıy. Balada sıyır sötenä qarşı allergiya bar ikän, käcä sötennän yasalğan yogurtlar qullana alasız.

Solı

Solı beta glyukan häm ŝink yärdämendä immunitetnı nığıta. Solı botqasına qızdırılmağan mindal’ häm turalğan banan da salıp bula.

Brokkoli

C, A häm E vitaminnarına bay bulğan brokkoli antioksidant deposı bulıp tora.

Yasmıq

Yasmıqnı köz häm qış aylarında atnada 2 tapqır aşaw faydalı. Üsemlek aqsımı bulğanğa, ul şulay uq balalarnıñ üsüenä yärdäm itä.

Yomırqa

Yomırqa äni sötennän soñ kilüçe iñ yaxşı aqsım çığanağı bulıp tora. Balalarğa här kön ber yomırqa aşarğa kiräk.

Çikläweklär

İmmunitetnı nığıtu öçen balalarğa urman çikläwege, ästerxan çikläwege, mindal’ häm qabaq töşe aşatu faydalı. İrtänge aşlarda tabınğa quyılğan bu läzzätle çikläweklär balanıñ könlek E vitaminın qanäğat’länderä.

Bal qortı söte häm bal

3 yäşennän zurraq balalarğa irtänge aştan alda yartı çäy qaşığı bal qortı söten bal belän butap aşatu immunitetnı nığıta. Läkin 3 yäşe tulmağan balalar, allergiyase bulğannar, astma belän çirläwçelär başta tabib belän kiñäşläşergä tiyeş.

Tim’yan

Tim’yannı här kön çäy kebek êçü immunitetka faydalı häm bronxit kebek problemalardan qotılırğa bulışa. Grippka qarşı yärdäm itä.

1 stakan suğa 2 çäy qaşığı tim’yan salıp, qaynatabız. Qaynap çıqqannan soñ 1 çäy qaşığı bal quşıp, här kön balağa êçerergä bula.

İmbir’le häm kurkumalı yogurt

Här kön 1 käsä yogurtka yartı çäy qaşığı imbir’ häm yartı çäy qaşığı kurkuma salıp, immunitetnı nığıtuçı 2 tämlätkeç häm yogurt yärdämendä balanıñ qış ayların tağın da ciñel uzdıruın täêmin itä alasız.

Banan häm yogurt

Här kön 1 käsä yogurt häm 1 keçkenä banannı quşıp, aşatabız. Êçäkleklärdä yäşäwçe ber törkem faydalı bakteriyalar zararlı mikroorganizmnarnıñ ürçüenä qomaçawlap, immunitetnı köçäytä. İñ möhim probiotik rizıq bulğan yogurtnı banan belän bergä aşağanda tağın da yaxşı êffekt kürsätä.

Tabiğıy antibiotik - sarımsaq

Suğan häm sarımsaq tabiğıy antibioitk bulıp tora. Sarımsaq balalarnıñ immunitetın nığıta, kiläçäktä astma belän çirläw riskın azayta.

Läkin sarımsaqnı alardaü salatlarda häm yogurtta çi kileş quşu möhim. Mayda qızdırılğan sarımsaq alay uq täêsirle tügel, immunitetka da bik faydası yuq.

Avtor – tabib Mäxmät Uçar