Törekmänstan ilbaşı Särdar Bärdemöxämmädovnıñ Üzbäkstanğa säfäre

Törekmänstan ilbaşı Särdar Bärdemöxämmädov, Üzbäkstan däwlät başlığı Şäwkät Mirziyayevnıñ çaqıruı buyınça, 14-15 nçe iyül’ könnärendä Üzbäkstanğa säfär qıldı. Anı Taşkentta Üzbäkstan prem’yer-ministrı Abdulla Aripov qarşı aldı. Törekmänstan ilbaşı berençe bulıp Yaña Üzbäkstan parkına barıp çäçäklär saldı.  

Üzbäkstan däwlät başlığı Şäwkät Mirziyayev qunaqnı Kuksarayda räsmi tantana belän qarşı aldı. Räsmi tantanadan soñ alar üzara küreşep söyläştelär. Soñınnan delegaśiyälär arasında oçraşu buldı. Söyläşülärdän soñ ike il arasında fän - belem, sänäğät’, turizm, awıl xucalığı, transport häm iq’tisad kebek törle ölkälärdä 19 kileşü imzalandı.

Üzbäkstan däwlät başlığı Şäwkät Mirziyayev ike il arasındağı urtaq säwdä külämeneñ 2021 nçe yılda 902 million dollar buluın, 2022 nçe yılda anı 1 milliardqa citkerüne maqsat itep quyuların, ike yaqlı säwdä külämeneñ täwge tapqır şundıy yuğarı kürsätkeçkä ireşüen äytte.

Törekmänstan ilbaşı Särdar Bärdemöxämmädov säfär qısalarında Taşkentta Üzbäkstannıñ Oli mäclese senatı räise Tänzilä Narbayeva belän oçraştı. Oçraşuda ike yaqlı mönäsäbätlärgä qağılışlı mäs’älälär xaqında fiker alıştılar.

15 nçe iyül’dä ike il liderları Sämärkandqa kittelär häm bergä Sämärkandta buldılar.

Monda şunı da äytergä kiräk: Bärdemöxämmädovnıñ säfäre qısalarında Üzbäkstanda törle çaralar ütkärelde. 13 nçe iyül’dä Taşkentta “Üzbäkstan häm Törekmänstan xezmättäşlegeneñ yaña tarixi êtabında üseş perspektivaları” isemle xalıqara konferenśiya uzdı. Konferenśiyädä ike il mönäsäbätlärenä qağılışlı törle mäs’älälär bäxäsläşelde.

12-14 nçe iyül’ könnärendä Boxarada Üzbäkstan – Törekmänstan regional’ forumı ütte. Forumda ike il arasında 451 million dollarlıq kileşülärgä qul quyıluı belderelde. Forum qısalarında Üzbäkstan –Törekmänstan Êş şurası cıyılışı uzdı.  

Taşkentta ike yaqlı mönäsäbätlärne nığıtaçaq möhim kileşülär imzalandı. Töbäktä genä tügel, ä böten dön’yada çikara sularnı qullanu belän bäyle problemalar bar.  Üzbäkstan häm Törekmänstan Amudär’ya suın saqçıl qullanu xaqında kileştelär. Aralnıñ kipkänen häm töbäktä çülläşüneñ däwam itüen isäpkä alğanda ike il arasındağı bu kileşü su qullanu turındağı potenśial’ bäxäslärne beterü yağınnan zur ähämiyätkä iyä.

Taşkentta çik töbägendä säwdä üseşeneñ yul kartasın bilgeläwçe kileşü imzalandı. Törekmänstan häm Üzbäkstannıñ iq’tisadi potenśialları bu kileşü yärdämendä qullanılaçaq. Monnan tış yaqlar üzara säwda yortları açarğa da uylıylar.

Transport - ike il öçen zur potenśialğa iyä ölkälärneñ berse. Citäkçelär bu ölkädä bulğan mömkinleklärne qullanırğa häm xezmättäşlekne iñ yuğarı däräcägä kütärergä kileştelär.

Şäwkät Mirziyayev Törekmänstan ilbaşın sentyabr’ urtalarında Sämärkandta uzaçaq Şanxay xezmättäşlek oyışması sammitında däräcäle, xörmätle  qunaq bularaq qatnaşırğa çaqırdı. Mondıy çaqıru iñ yaqın xezmättäşlek başqarğan illär arasında yasala. Yomğaqlap äytkändä Törekmanstan ilbaşı Särdar Bärdemoxämmädov berençe çit ilgä säfären Üzbäkstanğa yasadı häm bu säfär bik näticäle buldı.