Tatarstanda tabiğat’ baylığı häm awılda öy satıp alu mömkinlege

Tatarstan awıllarında öy alu yäki tözü öçen taşlamalı ipoteka

Tatarstanda yäşäwçelär taşlamalı şartlarda awıl cirendä yort satıp ala yäisä tözi ala. “Awıl cirleklären komplekslı üsterü” programmasın ğamälgä aşıru qısalarında “Rossel’xozbank” awıl ipotekasın birä. Tatarstan awıl xucalığı häm azıq-tölek ministrlığınıñ bu turıdağı xäbären “Tatar-inform” citkerä.

Taşlamalı ipoteka Rusiyä Federaśiyäse awıl xucalığı ministrlığı tarafınnan subsidiyälär birelgännän soñ yañadan torğızıldı. Finans çaraların xäzer xosusıy toraq tözeleşenä yäki şähär çitendä cir kişärlege belän yort satıp aluğa totarğa mömkin.

“Awıl ipotekası üzenä ixtıyac buluın kürsätte inde. Älege programma ğamäldä bulğan waqıtta Tatarstannıñ 2 meñ yarımnan artıq ğailäse toraq şartların yaxşırta häm awıl cirlegendä küçemsez milek satıp ala aldı. Bezneñ kliyıntlar arasında berence üz torağın buldıruğa ireşkän yäş’ ğailälärneñ küp buluı ayıruça söyınderä. Ä alar öçen awıl ipotekasınıñ töp östenlege stavka prośentınıñ tübän buluında”, - dip bilgeläp ütte “Rossel’xozbank”nıñ Tatarstan töbäk filialı direktorı Lälä Kudermetova.

Awıl ipotekasın yıllıq 3% stavka belän alırğa mömkin”, - diyıle xäbärdä.

“tatarstan.ru” saytı mäğ’lümatlärenä kürä isä, Tatarstanda taşlamalı kategoriya grajdannarın toraq belän täêmin itü programmasınıñ yıllıq planınıñ da 60%tan artığı ütälgän.

Tatarstannıñ tabiğate häm tabiğıy baylıqları

“Azatlıq” radiosı xäbär itüençä, tatar telendä “Tatarstannıñ tabiğate häm tabiğıy baylıqları” illyustraśiyäle ênśiklopediyäse dönya kürgän. Kitapqa 2 meñ mäqalä kergän. Ayırım alğanda, Tatarstandağı xayvannar, üsemleklär, tabiğıy baylıqlar, sular turında yazılğan.

Ênśiklopediya satuğa çıqmayaçaq. Ul Tatarstan mäktäplärenä häm kitapxanälärenä taratılaçaq.

Kiläçäktä Tatarstan ênśiklopediya institutı Qazan ênśiklopediyäsen êşlärgä cıyına. Anda şähär belän idarä itüçelär, tatar bistäläre turında yazılaçaq.

“Tatarstan toraq punktları” ênśiklopediyäseneñ tatar telendäge basması da äzer. İnstitut mödire İskändär Ğıyläcev beldergänçä, şuşı basma belän bergä tatar telendäge başqa xezmätlärneñ dä näşer itelüe öçen finans mömkinlekläreneñ buldırıluına ömetlänüen citkerde.

Tatarstan awıllarında yäşäwçelär sanı kimegän

“TNV Tatarstan Yaña Ğasır” saytı “Tatarstan awıllarında yäşäwçelär sanı kimegän” dip yaza:

“Soñğı 10 yılda Tatarstanda xalıq sanı artqan. Xäzer bezdä 4 million 5 meñ keşe yäşi. Sannarğa qarasaq, şähärdä yäşäwçelär kübäyä – alarnıñ sanı 3 millionnan artıp kitkän. Awıllarda ğomer itüçelär soñğı 10 yılda 1,5% kimegän. Monda xäzer 931 meñ keşe ğomer itä.

Awıldan 100dän artıq keşe şähärgä kitep êşli xäzer.

Êşsezlek probleması barç Ämma awılda yäşäw şartları naçar tügel. Respublika programmaları tirä-yünne dä, tormış şartların da uñay itä.

Tatarstanda awıl cirendäge bistälär yañara. Citeşterü urınnarı barlıqqa kilä, injenerlıq, sośial’ infrastruktura üseştä. Bu täcribäne taratırğa kiräk”, – diyılä yazmada.

Qazanda balalar tatar teatrı studiyäse häm parklar

“Watanım Tatarstan” gazetı “Qazanda “Apuş”lar kübäyır dip kötelä” isemle yazmasın täq’dim itä:

“Qazannıñ “Säydäş” mädäniyät yortında “Apuş” balalar tatar teatrı studiyäse üzeneñ berence prem’yerasın tamaşaçığa täq’dim itte. Zalda alma töşärlek urın da yuq ide. Älege spektakl’ Ravil Boxarayıv p’yesası buyınça Mödärris Äğ’lämov tärcemäsendä quyılğan.

Spektakl’ sabıylarnı ğına tügel, ölkännärne dä üz êçenä tartıp ala. Biredä qatnaşuçı balalar bigräk ostarıp betkän. Äle şuşı studiyädä dürt ay yörü däwerendä Xalıqara teatr könenä bağışlanğan videorolik töşerüdä qatnaşırğa häm Ğabdulla Tuqaynıñ tuğan könendä Tuğan tel könen bäyräm itü qısalarında uzğan şiğ’riyät bäyrämendä çığış yasarğa ölgergännär”, – dip yaza Gölgenä Şihapova.

“Şähri Qazan” gazetı isä “Parklar tözekländerüdä däwlättän yärdäm barmı?” isemle yazmasında Tatarstan başqalasındağı tuğız parknıñ sigeze “Uñaylı şähär moxite formalaştıru” federal’ proyıktı yärdämendä yañartıla”, - dip belderä.

Tatar dönyasında Sabantuylar

“Tatar-inform” agentlığı bıyıl Sabantuy cıyınnarınıñ qayçan häm qayda uzaçağı turında mäğ’lümat citkerä.

11nçe-13nçe iyün’dä milli bäyräm Tatarstan rayonnarında, şul isäptän Älmät, Alabuğa, Tübän Qama şähärlärendä oyıştırıla. 18nçe iyün’dä - Çallıda, 19nçı iyün’dä Qazan Saban tuyı bula.

Peterburg Saban tuyı – 25nçe iyün’dä Leningrad ölkäse Ênkolovo awılında, Mäskäw Sana tuyı – 2nçe iyül’dä.

Agentlıq çit illärdä uzaçaq Sabantuylar turında da xäbär itä. Tatar milli cıyınnarı bıyıl Qazaqstanda, Bolgariyada, Üzbäkstanda, Qırğızstanda, Azärbaycanda, Belarusta, Pol’şada, Êstoniyada, Kanada, İtaliya, Franśiyada, İzraildä, İspaniyada häm Tailandta uzaçaq.

“Tatar-inform” şulay uq Törkiyäneñ İskeşähärdäge tatar awılında 12nçe iyün’ yäkşämbe könne oyıştırılaçaq Sabantuy turında da xäbär itä.

Tatarstanda bitlek kiyü rejimı beterelä

Tatarstanda koronavirus pandemiyäse säbäple kertelgän bitlek kiyü rejimınıñ ğamäldä buluı tuqtatıla. Bu xaqta “Tatar-inform” agentlığına Tatarstan Däwlät başlığının matbuğat xezmäte citäkçese Liliyä Ğalimova xäbär itte.

“Azatlıq” radiosı mäğ’lümatlärenä kürä isä, Tatarstanda älegä qadär kön sayın koronavirus yoqtırunıñ 100dän artıq oçrağı açıqlana, ä xalıqnıñ kümäk immunitetı - 27,6% qına.

Tatarstanda bitlek kiyü tärtibe ike yıl êlek – 2020nçe yılnıñ 18nçe aprelendä ğamälgä kerde.

Tatarstan matbuğatında Törkiyä häm Törkiyä tatarları

Küzätüebezne Törkiyä häm Törkiyädä ğomer itüçe tatarlar turında Tatarstan matbuğatında çıqqan yazmalar belän tögällibez.

“Tatar-inform” agentlığı xäbärçese Ruşaniya Altay:

“Çulpan Çätin töreklärgä tatarlarnıñ kilengä qağılışlı inanuları turında söyläde”, – dip xäbär itä:

“Tatar-törek ğalimäse Çulpan Zarif-Çätin Törkiyädä oyıştırılğan “Törki mädäniyät häm ädäbiyatta – xatın-qız” dip atalğan xalıqara fänni simpoziumda tatar xalqında kilen-käläş belän bäyle yolalar xaqında doklad belän çıqtı.

Çulpan Zarif-Çätinnıñ çığışı “Qazan tatarlarında kilen belän bäyle inanular” dip atala. Ul alarnı tuyğa xätle häm tuydan soñğı ğoref-ğadätlär ütäleşe nigezendä tikşergän. Ğalimä qız yılatu, niqax, tuy, kilen töşerügä qağılışlı inanular belän tanıştırdı, kilengä su yulı kürsätü, toqmaç kisterü yolalarınıñ mäğ’nälären açıqladı”.

Agentlıqnıñ başqa ber yazmasında isä “İstanbulda ütkän xalıqara sänğät’ kürgäzmäsendä tatar-törek rässamı Aygöl Okutan icat äsärläre belän Tatarstannı täq’dim itte”, - dip citkerelä.

Tatarstanda xalıq sanı, oçqıç-poyızd säfärläre häm metro bäyäse | TRT Tatarça

 

Tatarstanda tuñdırma, ikmäk-kümäç, toraq häm uram artistları | TRT Tatarça