İmmunitetnı nığıtabız

Balanslı tuqlanu

İmmunitet turında qayğırtabız ikän başta döres tuqlanu yağın qaraw zarur. 4 azıq törkemen onıtmaska kiräk. Bolar: söt häm söt êşlänmäläre, it törkeme, yäşelçä häm ciläk-cimeşlär häm yarmalar. Ayıruça törle töstäge yäşelçä häm ciläk-cimeşlär antioksidant häm cepsel yağınnan bay.

Ayıruça suğan, sarımsaq, käbestä, şalqan, brokkoli, granat, äflisun, avokado belän ber rättän barlıq yäşelçä häm ciläk-cimeşlärgä ähämiyät birü zarur. Probiotik öçen yogurt, kefir, tozlanğan yäşelçälär, serkä kebek fermentlanğan rizıqlar belän tuqlanıp bula.

Yoqı bik möhim

Baliğ bulğannarğa könenä kim digändä 7 sägät’ yoqı kiräk. Yoqı immunitet häm tän sälamätlege öçen ähämiyätle.

Daimi künegülär

Fänni tikşerenülär künegülärneñ immunitetnı xäräkätkä kiterüen kürsätä. Regulyar räweştä sport belän şöğıl’länü immunitetnı nığıta.

Şikär häm uglevod qullanuğa iğtibar itü zarur

Uglevod bularaq şikär qomı häm şikärdän yasalğan azıq-töleklärgä ixtıyacıbız yuq.

Aqsımnarnı tiyeşle däräcädä alu

İmmunitet bülep çığarğan antitänçeklär aqsımnar strukturasında. Aqsımnı tiyeşle däräcädä alırğa kiräk. İt, tawıq, balıq, kürkä ite, yomırqa, söt häm söt êşlänmäläre, yarmalarda bar ul.

Atnada 3 tapqır balıq aşaw

Omega 3 may kislotaları da immunitetnı nığıtuda möhim rol’ uynıy. Balıq belän ber rättän portulak isemle yäşelçä belän ästerxan çikläwegendä dä bar bu maylar. Balıqnı miçtä yäki mangalda peşerü zarur. Qızdırudan taypılabız. Atnada 3 porŝiya tiyeşle.

Kurkuma

Organizmnı toksik täêsirlärdän saqlawçı bu sarı töstäge tämlätkeç immunitetnı aktiv xälgä kiterä häm sälamät küzänäklärneñ yuqqa çığuın buldırmıy. Xastalıqlarnı beterergä bulışa. Antioksidantlar yärdämendä infekŝiyalarğa kirtä quya. Här kön qullanıp bula kurkumanı. Ber stakan suda ber kisäk kurkuma tamırın qaynatabız häm êçenä limon sığabız. Ayıruça tämlätkeç bularaq qara borıç belän bergä aşlarğa da salırğa bula.

Maylı orlıqlar

Maylı orlıqlardan çi ästerxan çikläwege, urman çikläwege häm mindal’ E vitaminı, üsemlek may kislotası häm törle mineralğa bay. May töre bularaq ayıruça zäytün mayı, kokos mayı, avokado mayları köçle antioksidant bulıp toralar.

D vitaminı

D vitaminı immunitet öçen bik möhim, anıñ öçen qoyaşta bulırğa kiräk. Tabib belän kiñäşkännän soñ daruın da alıp bula.

Su

Su tändäge toksinnardan arınu häm metabolizmnı aktivlaştıru öçen ähämiyätle. Su aşqaynatu sistemasın çistarta, xastalıqlardan saqlanu öçen könenä 10-12 stakan su êçü zarur.

Kefir

Faydalı bakteriyaları yärdämendä kefir aşqaynatu sistemasın tärtipkä kertä, immunitetnı nığıta, gripp häm salqın tiyüdän saqlıy. Kefir yaratmawçılar yartı banan belän ber stakan kefirnı blenderda bolğatıp, smuzi kebek êçä ala.

Qızıl borıç

Qızıl borıç immunitetnı nığıta, qan äyläneşen tizlätä. Şulay uq antioksidant deposı bulıp tora. Baş awırtuında bulışa, awırtularnı basa.

Ŝitruslar

Mandarin, äflisun, greypfrut häm limon kebek ŝitruslar C vitaminına bay.

Yogurt

Yogurtta êçäkleklär öçen faydalı mikroorganizmnar bar. Êçäk florasın tärtipkä saluçı bu bakteriyalar organizmnı toksinnar häm patogennarğa qarşı saqlıy.

Sarımsaq

Sarımsaq immunitetnı nığıtuda bik möhim. Sarımsaqnı qarañğı häm qorı urında saqlarğa kiräk.

İmmunitetnı nığıtuçı çäylär

Yäşel çäy, imbir çäye häm şalfey çäye dä immunitetnı nığıtırğa bulışa.

Şulay uq C, D, B6 vitaminnarı turında onıtmasqa kiräk.

Läkin vitaminnarnı mömkin bulğança yäşelçä häm ciläk-cimeşlärdän alırğa kiräk.

Avtor – tabib Mäxmät Uçar