Tokayıvnıñ Rusiyägä säfäre näticäle buldı

10-11nçe fevral’ könnärendä Qazaqstan ilbaşı Rusiyä federaśiyäsenä räsmi säfär yasadı. Qasıym Cömärt Tokayıv 10nçı fevral’dä Mäskäwdä Rusiyä däwlät başlığı Vladimir Putin belän oçraştı. İke lider ğıynvar ayında Qazaqstanda bulğan waqıyğalarnı telgä aldı. Şulay uq, illär arasındağı iq’tisad, säwdä, mäğarif, ğaläm tikşerenüläre tarmaqlarında xezmättäşlek turında söyläştelär.

Vladimir Putin ğıynvar ayındağı waqıyğalar turında: “Qazaqstan ildäge awır xäldän faydalanuçı qayber xalıqara oyışmalarnıñ qorbanı buldı,”-dide. Ul Rusiyäneñ Kollektiv iminlek kileşüe berlegeneñ 4nçe maddäse qısalarında Qazaqstanğa yärdäm itüen xäterlätte.   

Monnan tış, Putin Tokayıvqa bolay dide: “Bu waqıyğalar waqıtında kilep çıqqan zararnı beterü öçen bik küp tırışlıq kiräklegen beläm. Tik Qazaqstan sezneñ arqada ayaqlarında nıq basıp tora häm üsä”.

Qazaqstan ilbaşı Tokayev ğıynvar ayında bulğan waqıyğalarnı tikşerüneñ däwam itüen belderde. “Qızğanıçqa, bik küp ülem oçrağı buldı häm min moña borçılam. Ğomere özelüçelärneñ ğailäläre häm yaqınnarınıñ qayğısın urtaqlaştım. Här oçraq ayırım-ayırım tikşerelä. Ğayeplelär tabılaçaq, cäzasın alaçaq,”-dide ul.

Tokayıv ilneñ strategik ob’yektların saqlaw häm terrorçılarğa qarata psixologik qarşılıq nisbätennän Kollektiv iminlek kileşüe berlegeneñ tınıçlıq köçläre uynağan rol’neñ ähämiten assızıqladı.

Oçraşuda Rusiyä liderı Putin ileneñ Qazaqstannıñ iñ zur säwdä häm iq’tisad partnyerı buluına qanäğat’ ikänen citkerde. 2021nçe yılda säwdä äyläneşe 34%qa artıp 25,6 milliard dollarlğa citkän.  

Oçraşudan soñ ike lider mäğarif, atom-töş ênergetikası mäydanında belgeçlär citeşterü, śifrlaştıru häm ğaläm tikşerenüläre belän bäyle 10 memorandum, timer yul transportı tarmağında xezmättäşlek kileşüe imzaladı.

Qazaqstan ilbaşı Qasıym Cömärt Tokayıv Rusiyä däwlät başlığı Vladimir Putin belän urtaq matbuğat cıyılışında Bauman isemendäge Mäskäw däwlät texnik universitetı şikelle Rusiyäneñ aldınğı uqu yortları filiallarınıñ Qazaqstanda açılaçağın äytte.   

***

Qasıym Cömärt Tokayıv Rusiyägä säfäre qısalarında 11nçe fevral’dä Tatarstanğa da bardı. Anı Qazan xalıqara aêroportında Tatarstan ilbaşı Röstäm Miñnexanov qarşıladı. İke lider mäşhür Qazan kremlendäge Qol Şärif mäçete belän Blagoveçeniye soborın qarağannan soñ räsmi söyläşü ütkärde. Anda Qazaqstan belän Tatarstan arasındağı mädäni, säwdä häm iq’tisadi xezmättäşlekne üsterü yulları qaraldı.

Oçraşu axırında Tatarstan ilbaşı Miñnexanov Qazaqstan liderı Tokayıvqa tatar-qazax xezmättäşlegeneñ üsüenä häm ike xalıq arasındağı duslıqnıñ nığuına kertkän öleşe öçen Duslıq ordenı täq’dim itte.  

Säfär qısalarında Tokayıv Tatarstanda Tatneft’ şirkätendä buldı. Rusiyädä iñ zur neft’ häm tabiğıy gaz citeşterüçelärennän berse bulğan älege ob’yekt belän Qazaqstannıñ KazMunayGaz şirkäte arasında neft’ yatmaların tikşerü häm qara altın çığaru tarmağında urtaq proyektlar başqaru turında kileşü imzalandı.   

Yomğaqlap äytkändä, Qazaqstan ilbaşı Qasıym Cömärt Tokayıvnıñ Rusiyägä säfäre näticäle uzdı.