Bil häm bot sızlasa

Utraqsa nerv – gäwdäbezdäge iñ ozın nerv. Anıñ zarar kürüe, bigräk tä, bilneñ artqı öleşendä häm ayaqlarda citdi awırtuğa säbäpçe bula. Sızlaw gäwdäneñ asqı yağına taba cäyelüen däwam itä.

Başta awırtu siräk bula, tik tora-bara şiqayät’lär artırğa mömkin.

Utraqsa nerv awırtuına qarşı kiñäşlärebez bolar:  

Söt, bal häm sarımsaq qatnaşması

Utraqsa nerv awırtuına qarşı tabiğıy yullar êzläwçelär bu däwalaw kursın uzsa, sızlanuları ciñeläyer.

Başta söt, bal häm sarımsaqnı quşıp êçemlek yasağız. Bu qatnaşma awırtunı basarğa yärdäm itär. Ozaq waqıt älege awırtudan tilmerüçelärgä anı daimi räweştä êçü kiñäş itelä.

Daruxanä bötnegeneñ êfir mayı

Bötnek mayı - tabiğıy däwalaw ısullarınnan berse. Antioksidant wazıyfasın başqaruçı tabiğıy bötnek mayı utraqsa nerv awıruına qarşı kiñäş itelä. Anıñ täêsiren kürü öçen maynı atnada 2 tapqır muyınnan ayaqlarğa qadär massaj yasap sörtergä kiräk.

Awırtu xis itkändä, organik bötnek mayın botlarığızğa sörtegez. Ul qan äyläneşen yaxşırta häm awırtunı basa.

Sarı mätrüşkä mayı

Yalqınsınunı kimetü köçenä iyä älege ülänneñ mayın utraqsa nerv awırtuı kiçergändä qullana alasız. Ayaqlarığızda aru häm awırtu xis itkändä sarı mätrüşkä mayın bot tiräsenä sörtü kiñäş itelä. Anı daimi qullanu sızlanularnı basar.

Suğan

Urtaça zurlıqtağı suğannı urtalay kisep ike öleşe belän dä tez qapqaçlarınnan tubıqqa qadär massaj yasap sörtäbez. Ul awırtunı basuçı häm yalqınsınunı beterüçe êffektı yärdämendä botlardağı sızlawnı kimetä. Ägär suğannıñ ise oşamasa, 1 säğat’tän soñ ayaqlarığıznı yua alasız.

Käbestä yafraqları

Käbestä yafraqları utraqsa nerv awırtuın ütkärep cibärü öçen kiñäş itelüçe ülän däwalaw ısullarınnan berse.

Käbestä yafraqların beräm-beräm qubarıp suda peşeregez. Cılı kileş alar belän botlarığıznı töregez häm beraz şul kileş totığız. Bu ısul qan äyläneşen tizlätäçäk, awırtu azalaçaq.

Köncet mayı häm waqlanğan imbir’

İmbir’ awırtu xis itkändä uyğa berençe bulıp kilä torğan ülän belän däwalaw ısullarınıñ berse. 1 aş qaşığı on xälendäge imbir’ne 2 aş qaşığı köncet mayı belän bolğatığız. Kremğa oxşaş qatnaşmanı tez qapqaçlarınnan öskä taba sörtegez häm anıñ señüen kötegez. Awırtu tiz arada sizelerlek kimiyäçäk.

Çıpçıq cileme üläne (aq omela)

Küp yıllar sınalğan häm awırtunı basu êffektı yış äytelep kilgän çıpçıq cileme üläne utraqsa nerv awırtuın da beterä. Ülänne 1 kasä qaynar suğa salıp tönätergä kiräk. Suınğaç anı sızlağan urınğa sortep tastımal belän törep torırğa kiñäş itelä. Monı atnada berniçä tapqır qabatlap utraqsa nerv awırtuın basa alasız.   

Kipterelgän töçe çiyä sabağı

Yaqınça 35 danä kipterelgän töçe çiyä sabağın ber stakan su belän 4-5 minut qaynatırğa kiräk. Şunnan soñ östenä ber totam (5-10 gramm) qıçıtqan östise. Bergä tağın 5 minut qaynatası. Suınğaç irtän häm kiçen ber atna buyı êçärgä kiräk.

Qaynar su paketları yäisä termoforlarnı bil tiräsenä quyıp sızlawnı kimetergä mömkin. Alarnı kön sayın yartı säğat’ qullanıp faydasın kürep bula.  

Cılı duş alu da şundıy uq näticä birä.

Künegülär

Säğat’lär buyı utırıp toru, östäl artında êşläw häm televizor qaraw, qızğanıçqa, umırtqa disklarınıñ urınnarınnan küçü qurqınıçın arttıra häm bil awırtuına säbäpçe bula. Utraqsa awıruların däwalawnıñ bik kübesendä künegülär qullanıla. Bu ciñelçä izometrik xäräkätlär näticäsendä köç tä arta, bot häm umırtqa bağanasındağı awırtular da kimi.

Başta utıru urınına qısqa arağa yörergä, basqıçtan menep töşärgä mömkin. Här könne cäyäw yörü arasın arttırırğa bula. Monnan tış, utıru poziśiyäsen üzgärtep toru da äybät bulaçaq.

Avtor:  tabib Mäxmät Uçar