Törkiyӓ saqlanu ministrınıň Urta Aziya Cömhüriyӓtlӓrenӓ sӓfӓre

Törkiyӓ saqlanu ministrı Hulusi Akar ağımdağı yılnıň 25-28 nçe oktyabr’ könnӓrendӓ Paqıstan, Qazaqstan hӓm Üzbӓkstanğa rӓsmi sӓfӓr yasadı. Ul 26 nçı oktyabr’dӓ Paqıstannan Qazaqstanğa kitte. Qazaqstanda anı wazıyfadaşı Nurlan Yermekbayev xӓrbi tantana belӓn qarşı aldı. Hulusi Akar Nur Soltan şӓhӓrendӓ Qazaqstan prem’yer-ministrı Askar Mamin, sӓnӓğӓt’ hӓm asqorma üseşe ministrı Beybut Atakulov, Qazaqstan Cömhüriyӓteneň  milli gvardiya sӓrğaskӓre Ruslan Jaksılıkov belӓn söylӓşülӓr ütkӓrde. Söylӓşülӓrdӓ ike yaqlı mönӓsӓbӓtlӓr hӓm regional’ mӓs’ӓlӓlӓr turında süz bardı. İsegezgӓ töşerӓbez: Törkiyӓ hӓm Qazaqstan 2018 nçe yılda xӓrbi xezmӓttӓşlek kileşü imzalağan ide. İke il arasında saqlanu tarmağındağı mönӓsӓbӓtlӓr 1990 nçı yıllar başınnan  dӓwam itӓ.

Törkiyӓ saqlanu ministrı 27 nçe oktyabr’dӓ Üzbӓkstanğa kitte. Hulusi Akarnı Taşkentta wazıyfadaşı Bahadır Kurbanov tantanalı rӓweştӓ qarşı aldı. Üzara hӓm wӓkilleklӓr ara söylӓşülӓrdӓn soň Törkiyӓ hӓm Üzbӓkstan saqlanu ministrlıqları arasında Xӓrbi finans xezmӓttӓşlege kileşüe belӓn Aqçalata yӓrdӓm kürsӓtü protokolı imzalandı. Akar şulay uq Üzbӓkstan qurqınıçsızlıq şurası ğomum sӓrqӓtibe Viktor Mahmudov belӓn küreşep söylӓşte. Anı Üzbӓksan ilbaşı Şӓwkӓt Mirziyayev da qabul itte.

     Törkiyӓ saqlanu ministrınıň Qarabax bӓreleşlӓre dӓwam itkӓndӓ tormışqa aşırğan bu sӓfӓre berniçӓ cӓhӓttӓn zur ӓhӓmiyӓkӓ iyӓ.

Uzğan yıl Üzbӓkstan saqlanu ministrı Kurbanov Qazaqstan saqlanu ministrı Yermekbayev belӓn oçraşuında illӓrneň hawa saqlanu sistemasın Törkiyӓ belӓn bergӓ aktivlaştırunı tӓq’dim itkӓn ide. Bu bӓylӓneştӓ Törkiyӓ êşlӓp çığarğan keşesez hawa apparatları, qorallı keşesez hawa apparatlarınıň Urta Aziya Cömhüriyӓtlӓre tarafınnan tӓêmin itelüe bik möhim.

Törkiyӓ xӓrbi tӓcribӓ, potenśial hӓm texnologiya cӓhӓtennӓn könçığıştağı qardӓşlӓre belӓn urtaqlaşırlıq küp nӓrsӓgӓ iyӓ.

Xӓrbi belem birü, küzlӓw hӓm mӓğ’lümat belӓn urtaqlaşu, saqlanu sӓnӓğӓte ölkӓsendӓ xezmӓttӓşlekne köçӓytü , zamança qorallar belӓn tӓêmin itü , kiber qurqınıçsızlıq tarmaqlarındağı xezmӓttӓşlek zur ӓhӓmiyӓtkӓ iyӓ. Şuňa kürӓ bu ölkӓdӓge yaqın xezmӓttӓşlekne dӓwam itterü barlıq yaqlar öçen dӓ faydalı.

2019 nçı yılnıň 22-27 nçe aprel’ könnӓrendӓ Üzbӓkstanda Törkiyӓ hӓm Paqıstan ğaskӓrlӓre qatnaşında “Partnyerlıq qalqanı – 2019” isemle xӓrbi künegülӓr ütkӓrelgӓn hӓm bu urtaq künegülӓrneň dӓwam itӓçӓge belderelgӓn ide. Hulusi Akarnıň sӓfӓren Paqıstannan başlawı bu bӓylӓneştӓ bik möhim.

Törkiyӓ saqlanu ministrınıň Şanxay xezmӓttӓşlek oyışmasına ӓğ’za ӓlege illӓrgӓ sӓfӓr qıluı Ӓnkaranıň küp yaqlı tışqı sӓyӓsӓt aňlayışın da kürsӓtӓ.

Törkiyӓneň Urta Aziya Cömhüriyӓtlӓre belӓn xӓrbi - texnik mönӓsӓbӓtlӓre bik yaxşı dӓrӓcӓdӓ. Bu mönӓsӓbӓtlӓrne strategik dӓrӓcӓgӓ kütӓrü waqıtı citte. Törkiyӓneň Yaqın Könçığış, Afrika hӓm Kavkazdan soň Urta Aziya illӓre belӓn saqlanu xezmӓttӓşlegendӓ mönӓsӓbӓtlӓrne yaňa dӓrӓcӓgӓ kütӓrü telӓge Ӓnkaranıň töbӓktӓge torışın, urının nığıtu, berlektӓşlӓre belӓn xezmӓttӓşlekne arttıru, qardӓşlek - tuğanlıq qısalarında  yӓrdӓm qulı suzu bӓylӓneşendӓ şaqtıy mӓğ’nӓle.