İlbaşı Ärdoğannıñ Baqığa säfäre

Törkiyä ilbaşı Räcäp Tayyip Ärdoğan 2020nçe yılnıñ 25nçe fevralendä Baqığa räsmi säfär belän kitte. Maqsat - Törkiyä-Azärbaycan yuğarı däräcäle strategik xezmättäşlek şurası cıyılışında qatnaşu.

Baqıda ilbaşı Ärdoğannı Azärbaycan däwlät başlığı İlham Aliyev räsmi tantana belän qarşıladı. Soñınnan ike lider küzgä-küz oçraştı. Törkiyä-Azärbaycan yuğarı däräcäle strategik xezmättäşlek şurası cıyılışı tögällängäç ike däwlät arasında 14 kileşü imzalandı.

Xäzergä qadär Törkiyä belän Azärbaycan TANAP, Baqı - Tbilisi -Kars timer yulı şikelle zur proyektlarnı başqardı. Cıyılışta timer yul êlemtäse häm ütkärgeçne Törkiyädän Naxçivanğa qadär ozaytunı küzallawçı kileşülär imzalandı. Änkara-Baqı poyızd êlemtäsen açu da tiz arada tormışqa aşırılaçaq. Xäzär diñgezen äylänep çığuçı timer yul da suzılsa - Könçığış häm Könbatış arasında özleksez çeltär barlıqqa kilä. Şulay itep, könçığış häm könbatış törkilär ber-bersenä tağın da yaqınayaçaq. Törkiyä Azärbaycan arqılı könçığışqa, törki dön’yağa çıqsa, Azärbaycan Törkiyä aşa könbatışqa, okeanğa taba suzıla.  Transport häm ênergetika - ikeyaqlı mönäsäbätlärneñ äydäp baruçı lokomotivları.

Törkiyä - Azärbaycan urtaq säwdä äyläneşe 2019nçı yılda 4 milliard yarım dollar buldı. Liderlar 2023nçe yılğa monı 15 milliardqa citkerü maqsatı quydı. Äzärbaycanda êşçänlek alıp baruçı Törkiyä çığışlı şirkätlärneñ sanı 4 meñgä yaqınlaştı. 15 törle tovarğa ikeyaqlı tamğaxanä irege häm taşlama küzallawçı östenlekle säwdä kileşüe tözelü, vizalarnıñ beterelüe, xezmättäşlek mäydannarın tağın da törleländerü älege maqsatqa ireşüne ciñeläytä.

Xocalı faciğase köne uñayınnan liderlar Karabaxnıñ Azärbaycan cire buluın tağın ber qat rasladı. Mäs’äläne xäl itü öçen EKKU Minsk törkemen beterep häm Törkiyä belän Qazaqstannı da kertep regionda köçle häm qızıqsınuçı däwlätlärdän toruçı yaña törkem qoru ähämiyätle.

İminlek ölkäsendä urtaq öyränülär uzdıru kiräk. İlbaşları 2020nçe yılda älege çaralarnıñ sanın arttıraçaqların, saqlanu sänäğate mäydanında urtaq citeşterü mäs’äläsen söyläşülären belderde. Karabaxnı kire alu häm regional’ solıx öçen - Törkiyä belän Azärbaycannıñ iminlek häm saqlanu mäydannarındağı xezmättäşlege şart.

Kileşü nigezendä ike däwlät arasında vizasız säyäxät waqıtı 90 köngä citkerelde. Bu wäzğıyät’ iq’tisad, turizm tarmaqları häm başqa ikeyaqlı mönäsäbätlärneñ tağın da üsüenä öleş kertäçäk.       

Törkiyä belän Azärbaycan yaxşı häm naçar köndä ber-bersenä teräk bulıp ürnäk mönäsäbätlär kürsätä. İl liderları bulsın, oyışma häm şirkätlär bulsın, Azärbaycan häm Törkiyä xalqı bulsın - ber-bersenä berençe bulıp şaltıratuçı, berençe bulıp qulların suzuçılar.

Törkiyä êlektron däwlät mäs’äläsendä täcribäsen Azärbaycan belän urtaqlaşa, Azärbaycan isä çit illärdän iñ kübe Törkiyägä investiśiyä kertä. Üzendä dä kübräk törek şirkätläre êşçänlek alıp bara. Törkiyä häm Azärbaycan arasındağı yärdämläşü häm xezmättäşlek yaraşuın başqa törki däwlätlär arasında da buldırırğa ide.   

Avtorı Abdrasul İsakov