Güväç

Törek aş-suları tapşıru tezmäbezneñ bügenge çığarılışında iğ’tibarığızğa bärän itle, yäşelçäle güväç, yäğ’ni çülmäk rizığı” reśeptın täq’dim itäbez. Törekçädä keräç çülmäktä peşkän aşamlıqqa da “güväç” dip äytelä. Härtörle it, yäşelçä yäki quzaqlılarnı güväçtä, keräç çülmäktä peşerä alasız. Çülmäk êçenä quyılaçaq azıq-tölek tradiśion bularaq utın miçendä peşerelä alınğanı kebek êlektrlı miçtä yäki turıdan-turı plitä östendä dä peşerelä alına. Peşerü öçen qaysı cihaznı saylasağız da, iğ’tibar itüegez kiräkle äyber: çülmäk êçendäge aşamlıqlarnıñ ğadättägedän tağın da ozaq waqıtta peşüe.  Monıñ säbäbe isä tufraqtan yasalğan sawıtlarnıñ, keräç çülmäklärneñ äkren cılınıp äkren suınuı. Çülmäktä, güväçtä peşkän rizıqlarnıñ tämle, läzzätle buluınıñ sere dä näq’ menä şuşında.

Bügen sezgä täq’dim itärgä telägän “bärän itle, yäşelçäle güväç” tä bärän ite yäşelçälär belän bergä ahäñ êçendä äkrenläp peşkän läzzätle aşamlıq.

Yäşelçäle güväçne yasaw öçen kiräkle äyberlärne sanap uzıyq:

700 gramm waq itep turalğan bärän ite

2 urta zurlıqtağı suğan

4 yäşel borıç

4 pomidor

2 baklajan

3 urta zurlıqtağı bäräñge

1 urta zurlıqtağı kişer

1 urta zurlıqtağı qabaq

1 aş qaşığı tomat pastası

3 teş sarımsaq

1 bal qaşığı qorıtılğan tim’yan

1 çäy qaşığı qara borıç

Citärle itep toz

Stakannıñ dürttän ber öleşe belän zäytün mayı.

Ä xäzer inde aşamlığıbıznı äzerlärgä küçik. İñ êlek qullanılaçaq çülmäkneñ êçke öleşen misväk belän maylıybız. Teläsägez çülmäkneñ töben sarımsaq belän dä ışqırğa bula. Bu räweşle sarımsaq aromatı aşamlıqqa tağın da kübräk täm-läzzät biräçäk.  Başta çülmäkneñ tübän öleşenä itlärne tezep quyabız. Suğannarnı bocra räweşendä turap, itlärneñ östenä quyabız. Alarnıñ östenä isä turalğan yäşel borıçlarnı urnaştırabız.

Baklajannarnı, qabaqnı häm bäräñgelärne dä it belän ber ük zurlıqta turıybız. Borıçlarnıñ östenä başta bäräñgelärne, annan soñ baklajannarnı häm soñınnan qabaqlarnı urnaştırabız. Çülmäkneñ iñ östenä bocra räweşendä turalğan pomidorlarnı quyabız. Tomat pastasın beraz su quşıp sıyığaytabız. Êçenä qara borıç, toz, tim’yan häm zäytün mayın quşıp yaxşılap bolğatabız. Tomat pastası sousın aşamlıq östenä tügäbez. Çülmäkne uçaqnıñ östenä (miçkägä) urnaştırabız häm nıq bulmağan utta ber, ber säğät’ yarım peşeräbez. İtle güväç rizığın peşergännän soñ qaynar kileş täq’dim itäbez. Tämle bulsın.