Yäşel baklalı artişok
Törek aş-suları - 18
Törek aş-suları digändä keşeneñ küñelenä, ğadättä, şiş käbap yäisä dönär kiläder. Yäğ’ni, it rizıqları. Yuqsa, törek aş-sularına, kiresençä, bik küp tördä peşkän yäşelçälär xas. Vegan yäisä vegetariannarnıñ tuqlanuına turı kilä torğan, it qullanmıyça peşerelüçe yözlärçä yäşelçä aşı reśeptı bar. Bügen sezne şularnıñ berse - yäşel baklalı artişok äzerlärgä öyräterbez. Artişoknı, ayıruça, Törkiyäneñ könbatış töbäklärendä peşerälär. Yl bik faydalı üsemlek. Belgeçlär, antioksidant üzençälege säbäple, artişoknıñ bawır öçen faydalı buluın söyli. Yäşel bakla borçağı da annan qalışmıy. Ul da sälamätlek öçen faydalı quzaqlı azıq. Bu ike yäşelçä bergä bulğanda, tabiğıy ki, tämle dä, şifalı da.
Qullanılaçaq rizıqlarnı sanıy başlağançı şunı iskärtep ütärgä kiräk: artişoknıñ yafraqlardan çistartqannan soñ qalğan qatı, aq öleşen qullanaçaqbız.
Bügenge aşıbız öçen menä bolar kiräk:
5 danä artişok
300 gramm yäşel bakla
2 danä suğan
yartı stakan zäytün mayı
yartı bäyläm ukrop
4 stakan su
yartı aş qaşığı on
ber yarım bal qalağı şikär qomı
yartı bal qalağı toz
1 limonnıñ suı
Xäzer çirat äzerläwgä citte. Başta artişoklar qara töskä kermäsen öçen alarnı limon belän ışqıybız. Soñınnan çoqırlı öleşläre öskä taba qarap toraçaq räweştä kästrülgä tezäbez. Suğannarnı ärçep berniçä öleşkä bülgälibez häm artişoklar yanına östibez.
Ayırım ber sawıtta zäytün mayı, şikär qomı, toz, on, limon suı häm 4 stakan sunı bergä quşıp bolğatabız. Anı artişoklar östenä ağızabız. Kästrülneñ qapqaçın qaplap urtaça utta peşerergä quyabız. Ul arada yäşel baklalarnıñ qabıqların ärçep yuabız. 15-20 minuttan soñ, yäğ’ni artişoklar yomşıy başlağaç, çistartılğan yäşel baklalarnı alarnıñ çoqırlarına tigez itep bülep quyabız. Tağın 25-30 minut peşeräbez.
Artişoklar kästrüldä suınğaç tälinkägä quyıp tabınğa birergä mömkin. Bu rizıqnı bülmä cılılığında yäisä suıq kileş aşıylar. Tämle bulsın!